Qaraýyl sońǵy ýaqytta túrlenip, gúldenip keledi.
Abaı eliniń ortalyǵy túrli halyqaralyq, respýblıkalyq, oblystyq is-sharalardyń ortalyǵyna aınaldy. Aýdan ákimi Tursynǵazy Músápirbekovtiń jetekshiligimen aýqymdy sharalardy qysylmaı-qymtyrylmaı ótkizerlik ahýal qalyptasty. Máselen, Qaraýyldaǵy Abaı kóshesi tolyq asfalttaldy. Q. Muhamethan, Qunanbaı kósheleri jóndelip, jaryqtandyryldy. Qunanbaı alańy jaıqalǵan gúlzarlarymen, saıabaǵymen eriksiz baýraıdy.
Qaraýyl sońǵy ýaqytta túrlenip, gúldenip keledi.Abaı eliniń ortalyǵy túrli halyqaralyq, respýblıkalyq, oblystyq is-sharalardyń ortalyǵyna aınaldy. Aýdan ákimi Tursynǵazy Músápirbekovtiń jetekshiligimen aýqymdy sharalardy qysylmaı-qymtyrylmaı ótkizerlik ahýal qalyptasty. Máselen, Qaraýyldaǵy Abaı kóshesi tolyq asfalttaldy. Q. Muhamethan, Qunanbaı kósheleri jóndelip, jaryqtandyryldy. Qunanbaı alańy jaıqalǵan gúlzarlarymen, saıabaǵymen eriksiz baýraıdy.
Altyn balyq pen qoltyraýyn músindi sýburqaq janǵa jaıly demalys ornyna aınaldy. Munyń bári bıyl júzege asqan qurylystar. Aýdandaǵy alty saıabaqty gúlmen qamtamasyz etetin jylyjaıda 25 myń túp gúl ósiriledi. Onyń 15 myń túbi – bir jyldyq shyraıgúl. Odan ózge shyrmaýyq, baldyrgúl, kópjyldyq gollandyq kanna, dekorasııalyq maqsatta úsh metrlik palma, qurma ósimdikteri de ósirilip otyr. Jylyjaıǵa jylý qazandyqtan beriledi. Al tóbesindegi áınekter eski aýrýhananyń buzylǵan terezelerinen quraldy. Gúlderdiń tuqymy men topyraǵyna, ósirý jumystaryna barlyǵy 1 mln. teńgege jýyq qarajat jumsaldy. Al gúldi satyp alsa 7-8 mln. teńge jumsalady eken. Bul aýdannyń bıýdjetin únemdeýge úlken múmkindik berip otyr.
Jýyrda abaılyq búldirshinderge arnalǵan balalar alańqaıy paıdalanýǵa berildi. Balabaqsha jasyndaǵy balalardyń alańsyz oınaýyna jaǵdaı jasalǵan alańqaı qurylysyna aýdandyq bıýdjetten 25 mln. teńge bólindi. Aýdandyq óner mektebiniń sheberleri jasaǵan ańdar men janýarlardyń músinderi sapaly ári kóz tartarlyqtaı ádemi. Oıyn alańynda átkenshek, batýt, balalardyń oıynshyq kólikteri qoıylǵan, oryndyq, jaryqpen qamtamasyz etilgen.
«Týǵan jerge taǵzym» aksııasy aıasynda quny 171 mln. teńge turatyn sport keshenin salýǵa qolushyn sozǵan Quljanovtar áýletiniń eńbegi atap aıtýǵa turarlyq. Búginde Londonda turatyn Medǵat Quljanovtyń jerlesterine mundaı aýqymdy syıdy jasaýy tegin emes. Jaqynda ótken Elbasy júldesine arnalǵan qazaq kúresi týrnırinde «Qazaqstan barysy» ataǵyn jeńip alǵan Aıbek Nuǵymarov – Qaraýyldyń túlegi. Aqyndar men balýandar aýylynda byltyr da bir sport ǵımaraty men syńǵyrlaǵan Mádenıet úıi paıdalanýǵa berilgen.
Bıyl 350 orynǵa arnalǵan aýdandyq aýrýhana kúrdeli jóndeýden ótkizilýde. Aýdan ortalyǵynda 27 páterli turǵyn úı paıdalanýǵa berildi. Jumyspen qamtý baǵdarlamasyna oraı 121 adamǵa 50 mıllıon teńge nesıe bólindi.
Basqasyn bylaı qoıǵanda, Abaı aýdanynda búginde 460 myń qoı-eshki, 50 myń múıizdi iri qara, 25 myń jylqy ósiriledi. Al keńes ókimeti kezinde aýdan shopandary 430 myń qoı baqqan eken. Iаǵnı, mal basy keńes ókimeti kezindegiden de kóbeıgen. Búginde kúnine 4 tonna shıpaly sýsyn óndiretin Sarjal aýyly qymyzynyń dańqy alysqa ketti. Turǵyndar Shyńǵystaý qymyzynyń dámi Italııa balmuzdaǵymen saıma-saı keledi desedi.
Buryn Abaı aýdanynyń jún shıkizaty eshqaıda ótpeı, dalaǵa tógip tastaıtyndyqtan, saı-salanyń barlyǵy aq-aıran bolyp shashylyp jatatyn. Endi aýdannyń sharýa qojalyqtary júnnen de tabys tabatyn bolady. Aýdanda jańadan «Derıkar» JShS-i iske qosyldy. Atalǵan kásiporyn «Ertis» ÁKK arqyly 20 mln. teńge alǵan bolatyn. Qazirgi kezde sehtyń oblys kóleminde 40-qa jýyq shıkizat daıyndaýshysy bar. 1 keli júndi 40 teńgeden qabyldaıdy. Aıyna 200 tonna jún óńdeýge qýaty jetedi. Kásipkerler Ertis Omarov pen Tasbolat Bıtenov sehtyń jún jýatyn qural-jabdyqtaryn 150 myń AQSh dollaryna satyp alypty. Qazirgi ýaqytta Qytaı kásipkerlerimen 2 jarym myń tonna jún ótkizýge kelisim-shart jasalǵan.
Dýman ANASh,
jýrnalıst.
Shyǵys Qazaqstan oblysy,
Abaı aýdany.
