Prezıdent • 21 Naýryz, 2020

Prezıdent Úkimettiń aldynda turǵan asa jedel ári shuǵyl mindetti atady

168 retkórsetildi

Memleket basshysy pandemııaǵa qarsy elimizdegi kúres jumystaryn úılestiretin Ortalyqtyń jumysymen tanysty.

Densaýlyq saqtaý mınıstrliginiń basshylyǵy Prezıdentke álemde jáne Qazaqstanda koronavırýstyń taralýyna qarsy kúresti úılestirý jáne monıtorıng jasaý ádisteri, onyń ishinde aýyrǵandardy anyqtaý jáne esepke alý jónindegi jumystarda sıfrlyq tehnologııany qoldaný týraly baıandady.

Qasym-Jomart Toqaev atalǵan ortalyqtyń álemdegi qolaısyz epıdemıologııalyq jaǵdaıynda atqaratyn mańyzdy rólin atap ótti jáne kúsh biriktire otyryp, oqıǵanyń keri áserine tosqaýyl qoıýǵa senim bildirdi.

Prezıdent qazaqstandyqtardy tynyshtyq saqtaýǵa shaqyryp, Úkimetke indettiń taralýyna baılanysty qaýesetter men dúrbeleńge tosqaýyl qoıý úshin azamattardy shuǵyl ári shynaıy aqparattarmen qamtamasyz etý mindetin qoıdy. Memleket basshysy osyǵan oraı qoǵamǵa qazirgi ahýal men memlekettiń qabyldap jatqan sharalary týraly aqparat taratatyn resmı arnalardy aıqyndaý jóninde tapsyrma berdi.

Jalpy Qasym-Jomart Toqaev koronavırýsqa qarsy kúresý úshin qabyldanyp jatqan sharalarǵa oń baǵa berdi.

– Úkimet az jumys istegen joq. Mamandardyń baǵalaýynsha, biz Eýropa elderine qaraǵanda aıtarlyqtaı shuǵyl áreket etip jatyrmyz. Degenmen bizge nátıje kerek. Halyq áli tolyq aqparat ala almaı otyr, – dedi Memleket basshysy.

Sonymen qatar Prezıdent medısınalyq betperdelerdiń tapshy ekenin aıtty.

– Bizde áli kúnge deıin tıisti kólemde betperdelerdiń jetispeıtindigin atap aıtqym keledi. Biraq qaǵaz júzinde bári jetkilikti. Bir jaǵynan halyq dárihanalarda betperdelerdiń áli de joq ekenin aıtyp shaǵymdanýda. Nege? Bul alypsatarlyq dep oılaımyn, - dedi Qasym-Jomart Toqaev.

Memleket basshysy halyqty betperdelermen jedel qamtamasyz etýdi talap etip, elimizdiń barlyq azamattaryn únemi antıseptıkterdi paıdalanýǵa jáne betperde taǵýǵa shaqyrdy.

– Biz barlyq qalalardaǵy negizgi kóshelerde azamattarymyzǵa tegin maska tarata alatyndaı bolýymyz kerek. Bul Úkimettiń aldynda turǵan asa jedel ári shuǵyl mindet, – dedi Prezıdent.

Qasym-Jomart Toqaev pandemııanyń 160-tan astam elge taralǵanyn atap ótip, shekaralas memleketterdiń Úkimetterimen is-qımyldardy úılestirýdiń mańyzdylyǵyna nazar aýdardy.

– Sońǵy birneshe kúnde Reseıdiń, О́zbekstannyń, Qyrǵyzstannyń Prezıdentterimen sóılestim. Negizinen biz Úkimetterimizdiń tyǵyz yqpaldasa jumys isteýi kerektigi jaıynda áńgimelestik. Bul ortaq másele bolǵandyqtan birlesken jumystardy arttyra túsýimiz kerek. Birlese áreket etken jón, - dedi Memleket basshysy.

Qazaqstan Prezıdenti elimizde karantın rejımin saqtaýdyń mańyzdylyǵyna toqtalyp, barlyq azamattardy, onyń ishinde, memlekettik qyzmetshilerdi belgilengen tártip boıynsha jumys isteýge shaqyrdy.

– Baqylaý-ótkizý beketterin qoıǵanymyz ázil nemese qoıylym emes. Karantın rejımin qatań saqtamaı, biz bul baǵytta eshqandaı tabysqa qol jetkize almaımyz. Biz karantın jaǵdaıyn qatań saqtaýǵa tıispiz, – dedi Prezıdent.

Qasym-Jomart Toqaev otandyq medısınany, sonyń ishinde, sanıtarlyq-epıdemıologııalyq qyzmetti jáne medısına ǵylymyn damytýǵa basa mán berý kerek ekenin aıtty.

– Qazir búkil álemniń jáne búkil álemdik ekonomıkanyń taǵdyry ǵalymdardyń qolynda. Bul artyq aıtqandyq emes. Álemniń taǵdyryn fýtbolshylar, shoý-bıznes ókilderi emes, ǵalymdar sheshedi. Biz osy jaǵdaıdan sabaq alýǵa tıispiz, - dedi Memleket basshysy.

Sońynda Qasym-Jomart Toqaev barlyq medısına qyzmetkerlerine koronavırýs pandemııasyna qarsy kúreske qosqan úlesi úshin rızashylyǵyn bildirdi.

Sońǵy jańalyqtar

Juma: Almatyda 28 indet oshaǵy karantınde tur

Ońtústik Qazaqstan • Keshe

Almatyda zerthanalar sany artady

Ońtústik Qazaqstan • Keshe

Uqsas jańalyqtar