Búgingi tańda quqyqtyq tártip áskeriniń jeke quramy tótenshe jaǵdaı men karantınge baılanysty barlyq sharalarǵa jumyldyryldy. El astanasynda kúndelikti 600-ge tarta ulandyq qyzmet atqarady. Odan bólek jekelengen baǵyt boıynsha tosqaýyl beketteri arasynda eki aýysymmen táýlik boıy 72 áskerı qyzmetshi jumyldyrylǵan. Polısııa qyzmetkerlerimen birlesip 18 avtopatrýldik kólikpen aınalma jol arqyly tranzıttik kólik qaýipsizdigin qamtamasyz etedi.
Sondaı-aq, ulandyqtar quqyq qorǵaý organdary men sanıtarlyq-epıdemıologııalyq stansııa jáne Qorǵanys mınıstrligi qyzmetkerlerimen birge 7 birdeı elordaǵa kirip, shyǵý tosqaýyl beketterinde kúsheıtilgen kúzetý rejımine kóshken.
Kezekshilik 12 saǵattyq aýysym boıynsha jasalynǵan. Tótenshe jaǵdaıǵa jumyldyrylǵan qyzmetkerlerdiń barlyǵy qorǵanys quraldarymen jabdyqtalǵan.
Qazirgi ýaqytta Nur-Sultan qalasyna kirip-shyǵý barlyq adamdarǵa ruqsat etilgen, alaıda 22 naýryz kúni 00:00 saǵattan bastap toqtatylady. Tek medısınalyq jabdyqtar men azyq-túlik tıegen kólikterge ruqsat.
Ulttyq ulan qyzmetshileri ońtústik astanada da kúsheıtilgen rejımde qyzmet atqaryp jatyr. Almatyda qoǵamdyq tártipti saqtap, tynyshtyqty kúzetý boıynsha 09:00-01:00 saǵat aralyǵynda 900-den asa ulandyq jumyldyrylǵan. Sonymen qosa, ulandyqtar osy kúnge deıin Almatyda vırýs juqtyrylǵan oshaq – kópqabatty turǵyn úılerdi kúzetýdi de qamtamasyz etti.
El tynyshtyǵy men qoǵamdyq tártipti qamtamasyz etýge respýblıka boıynsha jalpy sany 4 myńnan asa Ulttyq ulan áskerı qyzmtshisi jumyldyrylǵan.
