Qytaıdyń Chýnsın qalasy partııa komıtetiniń burynǵy hatshysy Bo Sılaı áıeli Bogý Kaılaıdyń bankidegi esepshotyna 5 mln. ıýan (817 myń dollar) aqsha qarajaty aýdarylýyna jaýapty ekenin moıyndady. Bul týraly ITAR-TASS habarlady.
Bastapqyda bul soma dalıan qalasynda ǵımarat salýǵa bólingen eken. Muny búgin senbi kúngi sotta 2002 jyly osy qalda sheneýnik bolǵan Van Chjengan aıǵaqtap berdi. Sonymen birge, qýǵynǵa ushyraǵan saıasatker óziniń ulyna bıznesmen Sıýı Mınniń saıahatqa shyǵý úshin jeke ushaq usynyp, onyń Fransııadaǵy keremet otelderde turýyn tólegeni men vılla satyp alyp bergenin joqqa shyǵarýyn jalǵastyrdy. Bo Sılaı munyń bárin bilmeıtinin aıtty.
Qazir burynǵy partkom hatshysy qyzmettik jaǵdaıyn paıdalanyp, 26,79 mln. ıýan (4,37 mln. dollar) kóleminde para aldy jáne otbasy músheleriniń ótinishimen kásipkerlerdiń múddelerin qorǵady degen aıyppen sottalǵaly otyr. 64 jastaǵy Bo Sılaı 2012 jylǵy qarashada ótken 18-sezde QKP Saıası bıýrosy quramyna enýge tolyq úmitti boldy. Alaıda, ótken jyldyń qyrkúıek aıynyń sońynda Saıası bıýro ony «aıtarlyqtaı tártip buzshylyqtarǵa jol bergeni úshin» partııa qatarynan shyǵaryp, isin quqyq qorǵaý organdaryna berý týraly sheshim qabyldap qoıdy. Qazannyń sońynda Qytaı Joǵarǵy halyq prokýratýrasy Bo Sılaıdyń «boljamdy qylmystyq isteri» týraly tekseristi bastady. Onyń áıeli Bogý Kaılaı Brıtanııa azamatyn óltirgeni úshin ólim jazasyna kesildi, al kómekshisi Van Lıszıýn para alǵany jáne laýazymyn asyra paıdalanǵany úshin 15 jylǵa bas bostandyǵynan aıyryldy.
Sáken Maılybaı.
