«Almatyda koronavırýstyń taralýyn múmkindiginshe tezirek toqtatý úshin qatań shekteý sharalarynyń qajettigi týyndady. Saýda ortalyqtarynyń, kıim-keshek bazarlardyń, mektepter men balabaqshalardyń, kafelerdiń, túrli salondardyń jáne basqa da qyzmet kórsetý salasyndaǵy kásiporyndardyń jumysyn ýaqytsha toqtatýǵa týra keldi. Biraz jurt aqysyz eńbek demalysyna ketýge, endi biri qysqartýǵa ilikti. Bul jaǵdaı az qamtylǵan jáne jumyssyz júrgen jandarǵa aýyr tıdi.
Qıyn jaǵdaıǵa tap bolǵan almatylyqtardy qoldaý úshin monopolıstermen lıft pen qoqysty shyǵarýdy qosa alǵanda, barlyq kommýnaldyq qyzmetter boıynsha tólemderdi keıinge qaldyrý týraly kelisimge keldik. Naýryz jáne sáýir aılaryna kelgen túbirtekterdi jyl sońyna deıin tóleýge bolady. Bul rette keshiktirgeni úshin ósimaqy men aıyppul eseptelmeıdi. Sondaı-aq, karantın kezinde qyzmet kórsetýshiler elektr, sý, jylý, gaz jáne telefon baılanysynda qaryzy bar tutynýshylardy ajyratpaıdy», deıdi megapolıs basshysy.
Demek, jyl sońyna deıin kommýnaldyq qyzmetterge qaryzy bar turǵyndardyń elektr jaryǵy, sýy, jylýy men gazy, lıftisi ajyratylmaıdy. Sonymen birge aqysy tólenbegen telefon baılanysy da óshpeıdi.
Dál osy sátterde Almaty ákiminiń karantın kezeńindegi kommýnaldyq qyzmetter úshin tólemderdi keıinge qaldyrý jónindegi bastamasyna baılanysty «Almatyenergosbyt» JShS dırektory orynbasary Olga Antonova, «Almatytelekom» О́TD V2S kommersııalyq dırektory Naıla Abdıldaeva brıfıng ótkizip, jýrnalısterdiń saýaldaryna jaýap berdi.
ALMATY
