Oblystaǵy órisi malǵa toly óńirdiń biri – Kegen aýdany. Osydan eki jyl buryn Raıymbek aýdanyna enshi berip, óz aldyna jeke dara qalǵan Kegende keleli is jalǵasyp jatyr eken. Bizdi tórt túlik tuıaǵynyń kóbeıgeni qýantty. Máselen, ótken jyly aýdandaǵy iri qara maly 50 894 basqa, jylqy sany 28 468 basqa jáne qoı men eshki úlesi 199 869 basqa jetipti.
Mal basy ósken jerde odan alynatyn ónim kólemi de kóbeıetini túsinikti. Ásirese, naryqqa tabıǵı sapasy joǵary et ónimin shyǵarý suranysqa saı eken. Derekke kóz salsaq, byltyr kegendik sharýalar salmaǵy 15 800 tonna bolatyn mal bazarlapty. Jınalǵan súttiń kólemi 25 010 tonnaǵa jetken. Kegen dalasyndaǵy shópti jep ósken tórt túliktiń eti ishki naryqtan asyp, shetelge shyǵa bastaǵan. О́ńirdegi «M.P.S.» jaýapkershiligi shekteýli seriktestigi Iranǵa 80 tonna jáne Qytaıǵa 280 tonna iri qara etin eksporttapty. Sóıtip, eksport jospary 180 paıyzǵa oryndalǵan.
Qazir maldyń basyn kóbeıte berýdiń mańyzy az. Neǵurlym asyl tuqymdy, et pen sútti molynan beretin mal basyn kóbeıtken abzal. Sharýalar da muny jaqsy túsinedi. Aýdandaǵy «Kazmıaso» jaýapkershiligi shekteýli seriktestigi byltyr Avstralııa memleketinen 1,4 mıllıard teńgege 1 500 bas asyl tuqymdy «Aberdın Angýs» sıyryn satyp ákeldi.
- Mal basyn kóbeıtip, tuqymyn asyldandyrý isi jalǵastyra beremiz. Bul bizge aýdandaǵy et, sút óndirisin órkendetýge jol ashady. Bıyl «Talas» aýylsharýashylyǵy kooperatıvi 400 basqa arnalǵan taýarly sút fermasyn ashady. Osy maqsatt Chehııadan 60 bas etti –sútti baǵyttaǵy «Sımental» asyl tuqymdy iri qara satyp aldy. Buǵan 51 mıllıon teńge jumsady. Jaqynda Jylysaı aýyldyq okrýginde 1500 bas qoıǵa arnalǵan mal bordaqylaý alańy óz jumysyn bastady. Mal basyn kóbeıtý de basty nazarda. Sharýa qojalyqtary «Sybaǵa» ,«Igilik» baǵdarlamasy aıasynda jalpy quny 83 230 000 teńge bolatyn 4 161 bas qoı satyp aldy. Jáne 33 mıllıon teńgege 167 bas iri qara, 34 mıllıon teńgege 115 bas jylqy ákelip, óristerin keńeıtip otyr, - deıdi Kegen aýdanynyń ákimi Talǵat Baıedilov.
Almaty oblysy
