Elordalyq Polısııa departamentiniń qyzmetkerleri tótenshe jaǵdaı men jarııalanǵan karantınge saı shaǵyn jáne orta bıznestiń qyzmetine tekseris júrgizdi. Qazirgi ýaqytta polısııa qyzmetkerlerine 235 erikti kómek kórsetedi, olar baqylaý beketterindegi, reıd kezindegi jumystarǵa tartylǵan.
«Elordada karantın rejımi jarııalanǵanda volonterler polıseılerge kómekke keldi. Olardyń árqaısysy azamattyq ustanymyn kórsetip, bizben birge jumys jasaýdy óziniń mindeti dep sanaıdy. Biz olardyń usynystaryn qýana qabyldadyq. Biz birlesip koronavırýstyń taralýyna qarsy tura alamyz. Bolashaqta eriktilermen birlesken jumys tájirıbesin qoldana alamyz dep úmittenemiz», - dedi elordanyń bas polıseıi Erjan Sádenov.
Tekseris barysynda eldegi tótenshe jaǵdaıǵa qaramastan, qaladaǵy birqatar uıymdardyń shtattyq rejımde jumys istegeni belgili boldy. Máselen, «Tulpar» saýda ortalyǵynda avtojýý, «Tapchan-7» kafesi, «Doner Mıks» qoǵamdyq tamaqtaný pýnkti, «Jiger» bılıard klýby jáne basqa da uıymdar jumysyn jalǵastyrǵan. Rejımdi buzǵan menshik ıeleri, shaǵyn jáne orta bıznes sýbektilerine ákimshilik hattamalar jasaldy. Atalǵan zań buzýshylyqtar týraly materıaldardy elordanyń mamandandyrylǵan aýdanaralyq ákimshilik soty beınekonferensııa rejıminde qarastyrǵanyn atap ótken jón. Barlyq mekeme ıelerine 10 AEK mólsherinde ákimshilik aıyppul salyndy.
Sonymen qatar reıd kezinde ýchaskelik polısııa ınspektorlary eriktilermen birge medısınalyq bettumshalar men antıseptıkterdi satýdyń zańsyz jaǵdaılaryn anyqtady. Quqyq buzýshylardan 188 betperde jáne 112 dana antıseptıkter tárkilendi. Satýshylarǵa ákimshilik hattama jasaldy.
