О́skemendegi A.Pýshkın atyndaǵy oblystyq kitaphana qyzmetkerleri «Týǵan jerge - taǵzym» jobasy aıasynda Shyǵys Qazaqstandaǵy jer-sý ataýlarynyń shyǵý tarıhyna qatysty biraz derekterdi jınastyrǵan eken. Búgin biz «Egemen» oqyrmandarynyń nazaryna sonyń birin usynýdy jón kórip otyrmyz.
***
Katon óńirinde Maıemer degen jer bar. Shejireshiler osy ataýdy Maıa bımen baılanystyrady. Olardyń aıtýynsha, Maıa bı jáne Qarataı eliniń taǵy bir beldi adamy, baıy Esbol Qurataıuly men batyry Jánibek Shaqabaıuly úsheýi 1750 jyldary bir shoǵyr eldi bastap ákelip, olardy osy óńirge qonystandyrady. Kóshi-qonmen júdep-jadap kele jatqan eldiń malyn Naryndy boılap, órleı aıdap, bir jasyl jazyqtyń shetine iline bergende kóshti toqtatyp, túnemelge kidiredi.
Yńyrshaǵy shyǵa bastaǵan malǵa erteńgilik óń bitip, qulpyryp sala bergenin baıqaǵan Maıa bı:
- Ash-aryǵyń toıynatyn jer eken, óńsheń semiz soıylatyn jer eken, bir-aq kúnde shyr qonatyn jer eken, kózderińe nur qonatyn jer eken, óris kúnde qulpyratyn jer eken, jumbaǵy mol syr tunatyn jer eken, at sońynan taı eretin jer eken, al adamdar maı emetin jer eken, osy ara Maıemer bolsyn, - degen eken.
Maıa bıdiń osy óńir týraly: «Qolshatyry basynda, jantorsyǵy qasynda, osydan artyq, jer uıyǵy bar ma?» degeni de qazir el arasynda qanatty tirkeske aınalyp ketken eken.
Derekterdi jınastyrǵan – kitaphana qyzmetkeri Gúlbarshyn Ábilǵazınova.
