Bilim • 25 Naýryz, 2020

Oqýshylar IV toqsandy qashyqtan oqıdy

773 retkórsetildi

Bul týraly Bilim jáne ǵylym vıse-mınıstri Sholpan Karınova habarlady. Mınıstrdiń orynbasary koronavırýstyń taralýyna qarsy kúres sharalaryn kúsheıtý maqsatynda 6 sáýirden bastap mektepter tórtinshi toqsandy qashyqtan oqytý formatynda bastaıtynyn jetkizdi. 

Oqýshylar kóktemgi demalysta júrgende, muǵalimderdiń jumystyń jańa formatyna daıyndyqty bastap ketkenin jazǵan Sh.Karınova:

– Qashyqtyq tártipte jumys isteýde muǵalimderdiń júıelik tájirıbesi joq ekenin eskeretin bolsaq, árıne, bul - ońaı sharýa emes jáne mundaı jumys buryn talap etilmegen. Desek te, sabaq barysynda muǵalimder sıfrlyq bilim berý resýrstarymen, elektrondy oqýlyqtarmen, elektrondy jýrnal júıelerimen buǵan deıin de jumys isteıtin. Bunyń ózi sıflyq júıede jumys isteýdiń qandaı da bir tájirıbesi ekeni anyq, – dedi.

Onyń aıtýyna qaraǵanda, qazirgi tańda mektep ákimshiligi, ádistemelik birlestik jetekshileri, ustazdar qashyqtan oqytýǵa aýysý baǵytynda belsendi jumys atqarýda. Eń mańyzdysy – osy máseleni durys túsiný. Qashyqtyq sabaq – ádettegideı qyryq mınýt kólemindegi sabaq emes. Qashyqtan beriletin sabaqtyń ádis-tásilderi, qaǵıdalary da basqa.
Osyndaı syn sátte ustazdardy kúshtep jumysqa tartyp, onlaın-sabaqtar jazýǵa májbúrlep otyr degen orynsyz suraqtar da týyndamaýy tıis. Qazirgi jaǵdaıda bul muǵalimniń ózine kerek nárse, bul muǵalim jumysynyń jańa sharty. Eń bastysy, oqýshylar muǵalimnen qyzyqty, tartymdy sabaq kútedi.

– Qurmetti ata-analar, birinshiden, bul máselege sizder túsinikpen qaraýlaryńyzdy, balaǵa jańa formatta oqý materıalyn ıgerýge kómek berip, muǵalim men oqýshy arasyndaǵy baılanystyń ornaýyna yqpal etip, qajetti nátıjege jetý úshin óz kómegińizdi berýdi suraımyz. Tek osylaı, birlese jumys isteý arqyly biz oqý úrdisin durys uıymdastyryp, balalarǵa qajetti bilim men quziretin bere alamyz.
Keıbir mektepterde sapaly ınternet máselesi, muǵalimder men oqýshylarda kompıýterdiń bolmaýy, otbasynda birneshe bala bolǵan jaǵdaıda kompıýterdi paıdalaný suraqtary, daıyn ınternet-platformalardyń joqtyǵy túsinikti. Bul suraqtar, árıne, bar, olar jeke turǵyda qarastyrylady, olardy sheshý joldary anyqtalyp qaldy, – dedi. 

Vıse-mınıstr óziniń feısbýktegi resmı paraqshasynda Bilim jáne ǵylym mınıstrliginde, aımaqtyq bilim berý basqarmalarynda qashyqtan oqytý júıesin uıymdastyrý boıynsha Jobalaý ofısi qurylyp otyrǵanyn; pandemııa kezeńinde oqý úrdisin uıymdastyrý boıynsha ýaqytsha sharalar engizgen kórshiles elderdiń tájirıbesi, halyqaralyq tájirıbe zerdelengenin; mektepter men ustazdar úshin tıisti usynymdar daıyndalǵanyn; ustazdar úshin arnaıy onlaın, tele-kýrstar, vebınarlar ázirlengenin atap ótti.

Sóziniń sońynda: 

– Sonymen qosa, ustazdar men balalarǵa "Balapan" jáne "El-Arna" telearnalarynda tórtinshi toqsan bastalsymen kúnde 1-11-synyp oqýshylaryna aptasyna bes kún sabaq ótkiziledi. Qazir osy tele-sabaqtardyń arnaıy túsirilimi júrgizilýde. Ol sabaqtar memlekettik standart talaptaryna, oqý baǵdarlamalaryna sáıkes qurylǵan. Oqýshylar úshin 2 myńnan astam tele sabaq daıyndalady. Buǵan úlken kúsh jumsalýda. Nur-Sultan qalasynyń, Nazarbaev Zııatkelik mektepteriniń, respýblıkalyq, halyqaralyq jáne jeke mektepterdiń úzdik ustazdary elimizdiń barlyq balalaryna sabaq beredi. Ustazdarǵa tek qoldaý qajet, – dedi Sh.Karınova

Sońǵy jańalyqtar

Juma: Almatyda 28 indet oshaǵy karantınde tur

Ońtústik Qazaqstan • Keshe

Almatyda zerthanalar sany artady

Ońtústik Qazaqstan • Keshe

Uqsas jańalyqtar