Qazaqstan Prezıdenti Ulttyq bıotehnologııa ortalyǵyndaǵy otandyq ǵalymdardyń zertteý jumystarymen tanysty. Ortalyq qyzmetkerleri Memleket basshysyna DNQ jasandy sıntez jolymen ázirlengen jáne juqpaly koronavırýs aýrýynyń jańa túrin jyldam anyqtaýǵa múmkindik beretin polımerazdy tizbekti reaksııa (PSR) negizindegi test júıesin tanystyrdy. Atalǵan test júıesi sheteldik dıagnostıkalyq qural-jabdyqtarmen salystyrý kezinde óziniń joǵary sezimtaldyǵyn kórsetken. Qazirgi ýaqytta Qazaqstannyń bıologııalyq qaýipsizdigin qamtamasyz etý qajettigin jáne COVID-19 vırýsynyń ártúrli klımattyq jaǵdaılarǵa beıimdelý qabiletin eskere otyryp, Ulttyq bıotehnologııa ortalyǵy men Bıologııalyq qaýipsizdik problemalary jónindegi ǵylymı-zertteý ınstıtýtynyń ǵalymdary koronavırýsqa qarsy vaksına jasaý boıynsha birlesken jumystaryn bastap ketti. Qasym-Jomart Toqaev bıolog ǵalymdardyń eńbegin joǵary baǵalap, Qazaqstan ǵylymynyń quzyretin arttyrý úshin otandyq ázirlemelerdiń mańyzdylyǵyn atap ótti.
– Shyn máninde, bul zerthana Qazaqstan úshin biregeı sanalady. Biz sizderdiń ǵylymı jumystaryńyzǵa zor úmit artamyz. Qajetti kómek beriledi. Vırýs pen onyń taralýy bıologııalyq laboratorııalardyń, medısınalyq jáne sanıtarlyq qyzmetterdiń jumystaryna memlekettiń erekshe kóńil bólýi tıis ekenin kórsetti, - dedi Memleket basshysy. Prezıdent karantın talaptaryn saqtaý qajettigi jaıynda aıtty. – Men azamattarymyzdy karantın rejımin saqtaýǵa shaqyramyn. Biraq, eshqandaı dúrbeleń týǵyzýǵa bolmaıdy. О́ıtkeni indet ejelden optımızm men ómirge qushtarlyq saltanat qurǵan, adamdardyń jigeri muqalmaıtyn jerlerdi aınalyp ótedi. Sonymen qatar kimde-kim depressııaǵa túsip, qaıǵyǵa salynatyn bolsa, ınfeksııa da soǵan úıir bolady. Sondyqtan bárimiz birge bolýymyz kerek. Al aýyrǵandarǵa keletin bolsaq, olardy eshqandaı da shettetpeımiz. Barlyq qajetti emdeý sharalary júrgiziledi. Biz olarǵa da, karantınde jatqan azamattarǵa da qamqorlyq jasaımyz, - dedi Memleket basshysy.
Prezıdent Tótenshe jaǵdaı jónindegi memlekettik komıssııanyń otyrysynda aýqymdy is-qımyldar jospary jarııalanǵanyn atap ótti. Ol boıynsha halyqqa, onyń ishinde, bıznes ókilderine qarjylaı kómek beriledi.
- Salyqtyq jeńildikter men kredıt júktemelerin tómendetý sharalaryn eseptemegende, daǵdarysqa qarsy jumsalatyn qarjynyń jalpy kólemi 10 mıllıard dollardan asady. Bul - buryn-sońdy bolmaǵan soma. Bizdiń aldymyzda qazir osy qarajatty óte tıimdi jumsaý mindeti tur. Biz osy baǵyt boıynsha jumys isteımiz. Jaǵdaı baqylaýda, azamattar memlekettiń qamqorlyǵyn sezinýde. Bul - bizdiń jumysymyzdyń negizgi basymdyǵy, - dep qorytyndylady Qasym-Jomart Toqaev.
Ortalyq jumysymen tanysý barysynda Bilim jáne ǵylym mınıstri Ashat Aımaǵambetov, Densaýlyq saqtaý mınıstri Eljan Birtanov, sondaı-aq, Ulttyq bıotehnologııa ortalyǵynyń bas dırektory Erlan Ramanqulov baıandama jasady.
Buǵan deıin otandyq ǵylymı uıymdar qysqa merzim ishinde qus tumaýy men dońyz tumaýyna, nodýlıarly dermatıtke jáne brýsellezge qarsy vaksınalar ázirlegen bolatyn. Jalpy vaksınanyń 28 túri jasalyp jáne dıagnostıkalyq test júıesiniń tehnologııalary ázirlendi. Munyń keıbiri shet elge shyǵarylady.
