Budan bylaı «Qosyl» qalalyq jastar resýrstyq ortalyǵy atalatyn mekemege arnaıy kelgen qala ákimi Nurlybek Nálibaevqa «Jas sarbaz» respýblıkalyq áskerı-patrıottyq qozǵalysynyń oblystyq uıymy jetekshisi Aıdos Qojamuratov raport berip, klýb músheleri qarýdy bólshektep-jınaýdan úırengen mashyqtaryn kórsetti. Qazir qala mektepteriniń 1500-ge jýyq oqýshysy osy uıym múshesi sanalady.
«Qosyl» qalalyq jastar resýrstyq ortalyǵynyń dırektory Keńshilik Sabyrjan ortalyqtyń jumysy men aldaǵy jospary týraly aıtty.
Volonterlik baǵyttaǵy jobalar qalada 5 jyl buryn qolǵa alynǵan. Qazir 20-dan astam uıym túrli baǵytta qyzmet etip keledi. Endi «Qosyl» solardyń basyn biriktirip, jastardyń bos ýaqytyn tıimdi uıymdastyrý, NEET sanatyndaǵylarmen jumysty kúsheıtý, sýısıd pen quqyq buzýshylyqtyń aldyn alý, onlaın keńes berý sekildi baǵyttar jandana túsedi.
Qala basshysyna «28 ilmek» volonterler klýbynyń jetekshisi Áıgerim Nurlan atqaryp jatqan jumystaryn tanystyrdy. Shala týǵan sábılerge tabıǵı júnnen kıim toqıtyndar qatary jyl saıyn artyp keledi. Osyǵan deıin 1500-den astam balaǵa toqyma kıim tartý etken klýb músheleri óndiriske qajetti materıaldy ózderi satyp alyp kelipti. Byltyrdan bastap «Samuryq-Qazyna» qorynyń grantyn utyp alyp, shaǵyn baspahana ashty. Endi sodan túsken tabysty osy isti jandandyrýǵa jumsap, qaıyrymdylyq aıasyn keńeıte túspek.
Is-sharada «Qyzylorda – qaıyrymdy jandar» volonterler tobynyń jumysy da tanystyryldy. Qazir «Álem sizben ádemi» jobasyn qolǵa alǵan top músheleri ońaltý ortalyqtary men «Atameken» balalar aýyly, «Analar úıi», «Qarttar úıi» turǵyndary úshin sulýlyq salondary qyzmetin tegin usynady. Al «Ozat» jobasy aıasynda kóp balaly jáne áleýmettik jaǵynan az qamtylǵan otbasylar balalary túrli úıirmelerge qatysady.
Kezdesýde qala basshysy ataýly jyldaǵy bastamalar týraly baıan etti. Bıyl oblys ortalyǵynda 12 áleýmettik joba júzege asyrylady. Qazir «Birgemiz» eriktiler korpýsy» arnaıy jobasy bastaý alyp, volonter jastardyń bazasy qurylýda.
– Osy jyly eriktilik pen belsendiliktiń úlgisin tanytyp júrgen jerlesterimiz arasynda arnaıy baıqaý jarııalanady. Jyl kóleminde volonterler qozǵalysyna erekshe atsalysqan azamattardy anyqtap, eńbegine alǵys retinde shetelge saıahat joldamasyn tabystaımyz. Olar sol sapardan qala mádenıetin damytý, qorshaǵan ortany kórkeıtý, kógaldandyrý baǵytynda tyń ıdeıalar alyp keledi degen oıdamyz jáne sony oblys ortalyǵynda júzege asyrýyna qoldaý jasaımyz, – dedi qala ákimi Nurlybek Nálibaev.
Qyzylorda
