Aımaqtar • 26 Naýryz, 2020

Shymkent qalasynyń ákimi Murat Áıtenov arnaıy málimdeme jasady

597 retkórsetildi

Búginnen bastap Shymkent qalasyndaǵy barlyq balabaqshalardyń jumysy toqtatylady. Shymkent qalasyndaǵy ózge de qaýipsizdik sharalary týraly qala ákimi Murat Áıtenov málimdeme jasady. 

«Qurmetti Shymkent qalasynyń turǵyndary! Barshańyzǵa belgili aǵymdaǵy jyldyń 16 naýryzynda Qazaqstan Respýblıkasy Prezıdenti Qasym-Jomart Toqaev el aýmaǵynda Tótenshe jaǵdaı jarııalady. Sol ýaqyttan bastap Densaýlyq saqtaý mınıstrligi koronavırýstyń taralýyn aldyn alýǵa sáıkes bekitilgen algorıtmder boıynsha jumys istep jatyr. О́kinishke oraı, qalamyzda koronavırýs indetin juqtyrǵan 2 azamat tirkeldi. Qazirgi ýaqytta olar Shymkent qalasynyń juqpaly aýrýlar emhanasynda oqshaýlanyp, em qabyldaýda. Jaǵdaılary turaqty. Birinshi naýqas 18 naýryz kúni saǵat 17:30-da Nur-Sultan qalasynan «Nur-Sultan – Jetisaı» baǵytymen júretin 51 adam mingen avtobýspen kelgen. 20 naýryz saǵat 23:30-da tórt azamat Shymkent qalasyna «Bekjan» avtovokzalynan túsip, úsheýi Túrkistan qalasyna bet alǵan. Al bireýin ákesi óz kóligimen úıine jetkizgen. Qalǵan 47 azamat Jetisaı baǵytyna sol avtobýspen saparyn jalǵastyrǵan. Al jaman indetti juqtyrǵan azamat 23 naýryzǵa deıin úıinde óz betinshe em qabyldaǵan. Aýrýy asqynǵan soń joǵary temperatýramen jergilikti ambýlatorııaǵa shaǵymdanǵan. Nátıjesinde osy azamat otbasymen stasıonarlyq baqylaýǵa alyndy. Búginde atalǵan azamattyń anasynan test alynyp, nátıjesi oń boldy. Shuǵyl túrde naýqastarmen qatynasta bolǵan eki medısına qyzmetkeri otbasylarymen jáne bes potensıaldy qatynastaǵy azamattar oqshaýlanyp, juqpaly aýrýlar aýrýhanasyna jatqyzyldy. Búgingi tańda Nur-Sultan, Shymkent, Túrkistan qalalaryndaǵy atalǵan azamatpen baılanysta bolǵan barlyq adamdar oqshaýlanýǵa alyndy. Qazirgi tańda indettiń aldyn alý maqsatynda Shymkent qalasynda úzdiksiz jumystar júrgizilip jatyr. Qaýipsizdik sharalarynyń negizgi baǵyttaryna toqtalyp ótsem:

Birinshiden, qalaǵa kiretin azamattardyń densaýlyǵyn tekserýden ótkizip, qaýipsizdikti qamtamasyz etý maqsatynda kire-beris jol qaqpalarǵa 12 sanıtarlyq beketter qoıyldy. Buǵan deıin temirjol vokzaly men áýejaı da sanıtarlyq baqylaýǵa alynǵan. Ekinshiden, qaladaǵy bazarlarda, saýda oryndarynda, avtobýstarda, qoǵamdyq oryndarda jáne basqa da adamdar kóp shoǵyrlanatyn jerlerde dezınfeksııalyq jumystar kúnine 2 ret júrgizilýde. Úshinshiden, barlyq qoǵamdyq oryndarǵa betperdemen kirý mindetteldi. Betperdemen qamtamasyz etý úshin jergilikti kásipkerlermen birge kúnine 100 myńnan astam medısınalyq betperdeler tigilip, qala aýmaǵyndaǵy bazarlar men dárihanalarǵa jetkizilýde. Sonymen qatar antıseptık ónimderin shyǵaratyn Ordabasy ındýstrıaldyq aýmaǵyndaǵy kásiporyn kúnine 400 tonna zalalsyzdandyrý ónimderin shyǵarýda. Tórtinshiden, qaýipsizdik maqsatynda qala aýmaǵyndaǵy oqý oryndarynyń barlyǵy demalysqa shyǵyp, qashyqtan oqytý júıesimen jumys isteıdi. Al 26 naýryzdan bastap balabaqshalardyń barlyǵy jumysyn toqtatatyn bolady. Sonymen qatar, qaladaǵy toıhanalar, oıyn-saýyq oryndary tolyǵymen toqtatylyp, saýda ortalyǵy men meıramhanalardyń jumys ýaqyttary shekteldi. Besinshiden, Shymkent qalasy ákimdigi tarapynan áleýmettik mańyzy bar taýarlardyń baǵasyn turaqty ustap turý boıynsha arnaıy shtab qurylyp, azyq-túliktiń baǵalaryna kúndelikti monıtorıng júrgizilýde. Búgingi tańda asa qajetti 19 azyq-túlik túriniń baǵasyn turaqty ustap turý úshin 3 mlrd teńgege jýyq qarjy qaraldy. Shymkentte azyq-túlik qory jetkilikti, baǵa baqyldaýda. Sondyqtan alańdaýǵa esh negiz joq. Altynshydan, 15 naýryzdan bastap Shymkent qalaaralyq avtobýstar vokzalynan júretin halyqaralyq jáne 22 naýryzdan júretin Nur-Sultan men Almaty baǵyttary shekteldi. Búginnen bastap avtobeketterdiń jumysy tolyǵymen toqtatyldy. TJ jarııalanýyna baılanysty búgingi kúnde qoǵamdyq kólikter baǵytynyń 25 paıyzy ýaqytsha qysqartyldy. Jetinshiden, qala aýmaǵyndaǵy koronavırýs ınfeksııanyń jappaı taralý qaýpi anyqtalǵan jaǵdaıda áreket etýdiń algorıtmi jasalynyp, aýrýlar jatqyzylatyn 170 oryndyq ınfeksııalyq stasıonar quryldy. Budan basqa 680 oryndyq provızorly jáne 1500-ge jýyq karantındik stasıonar daıyndaldy. Búgingi tańda medısınalyq qyzmetkerler jumysyna qajetti qural-jabdyqtar men dáriler tolyǵymen jetkilikti. Qajettilik bolǵan jaǵdaıda budan basqa da bekitilgen algorıtm boıynsha jumystar júrgiziletin bolady. Búgingi tańda qalany tolyq karantınge jabýǵa negiz joq. Másele meniń jeke baqylaýymda. Qala turǵyndaryn aqparatpen qamtamasyz etý maqsatynda baılanys ortalyǵy quryldy. Qazirgi tańda qala turǵyndary Densaýlyq saqtaý mınıstrligi usynǵan profılaktıkalyq sharalaryn qatań qoldanýymyz qajet. Tótenshe jaǵdaıda árbir turǵyn qaýipsizdigi mańyzdy. Sondyqtan bárimiz arnaıy talaptardy saqtaýǵa mindettimiz.

Qurmetti jerlester! TJ kezeńinde barlyq saqtyq sharalaryn qoldanyp, ózderińizdiń jáne jaqyndaryńyzdyń qaýipsizdigi úshin úılerińizde bolýyńyzdy suraımyn. Barlyq jaǵdaılarǵa túsinistikpen qaraýlaryńyzdy ótinemin», dedi Shymkent qalasynyń ákimi Murat Áıtenov. 

Sońǵy jańalyqtar

Kókshetaýda qara daýyl, qarly jańbyr

Aımaqtar • Búgin, 22:15

Tynyshtyqbek Ábdikákimuly. KARANTIN

Ádebıet • Búgin, 20:57

Almaty: Jolaýshylar aǵyny men kólik sany azaıdy

Ońtústik Qazaqstan • Búgin, 18:10

Betperde kıgen kóktem - 6

Qoǵam • Búgin, 17:09

D dárýmeni - ınfeksııalardyń «jaýy»

Koronavırýs • Búgin, 16:47

Shymkent: Sıfrly otbasynyń bir kúni

Ońtústik Qazaqstan • Búgin, 15:58

Uqsas jańalyqtar