«О́zderińiz biletindeı, álemde COVID-19 koronavırýsynyń tez taralýy jaǵdaıynda shet elderdegi kóptegen otandastarymyzda elimizge qanshalyqty jyldam jetýge bolady degennen bastap, olarǵa Qazaqstanǵa qaıtýdyń qajettiligi bar ma degenge deıin túrli saýaldar týyndady. Kóp jaǵdaıda bizdiń shetelderdegi mekemelerde jedel jelilerdiń telefondary shamadan tys júktelip ketkendikten azamattarymyz qońyraý shala almaı, narazylyq bildire bastady, máselelerdi sheshý ýaqyty sozyla bastady. Árbir otandasymyzǵa jeke kóńil bólý qajet boldy.
Bizdiń Nıderlandtaǵy Elshiligimiz qalyptasqan jaǵdaıdan shyǵýdyń jolyn tapty. Sıfrlandyrý Eýropada koronavırýstyń qarqyndy taraýy kezinde kómekke keldi. 24 naýryzda QR Elshisi Maǵjan Ilııasov «Zoom» onlaın konferensııa-platformasynda osy elde turatyn otandastarymyzben arnaıy beınekonferensııa ótkizdi.
Is-sharaǵa bizdiń stýdentterdiń ata-analary men týystary da qosyldy. Onlaın is-shara kezinde Elshi QR azamattarynyń shetelde qaýipsiz bolýy máseleleri boıynsha Syrtqy ister mınıstrligi men Qazaqstannyń barlyq shet elderdegi mekemeleriniń júrgizip otyrǵan jumysy týraly, sondaı-aq bizdiń azamattarymyzdyń Nıderlandydan Qazaqstanǵa qaıtyp kelý múmkindikteri týraly habardar etti. M. Ilııasov bizdiń azamattarymyzdyń barlyq suraqtaryna jaýap berip, karantın erejelerin saqtaýǵa shaqyrdy.
Jalpy, Elshiliktiń bul bastamasy oń qabyldandy. Osylaısha, sıfrlandyrý jáne qarapaıym ınteraktıvtik suhbat pandemııa jaǵdaıynda azamattarymyzdy qorǵaý boıynsha júrgizilip jatqan jumys týraly keńinen aqparattandyrý máselesin sheshýge kómektesti», delingen habarlamada.
