Sýretti túsirgen Erlan Omar, «EQ»
Qaýipti indetten qorǵaný maqsatynda elimizdegi iri qalalar men oblys ortalyqtarynda kóshelerdi dezınfeksııalaý sharalary júrgizilýde. Aıtalyq Qarýly Kúshterdiń bıologııalyq qorǵaý bólimsheleriniń jeke quramy Nur-Sultan qalalyq dezınfeksııa qyzmetimen birge elorda kóshelerine óńdeý júrgizýdi bastap ketti. Dezınfeksııalyq eritindisi bar jeke gazsyzdandyrý jıyntyǵymen jabdyqtalǵan áskerı qyzmetshiler jáne avtomobıl quıý stansalarynyń legi jol boıymen birdeı qozǵalyp, qalanyń birneshe iri kóshelerin óńdedi. Koronavırýs ınfeksııasynyń taralýyn boldyrmaý jónindegi jedel shtabpen ózara is-qımyl aıasynda uıymdastyrylǵan dezınfeksııalaý jumystary aıasynda arnaıy óńdeýge arnalǵan aýmaqtardy jergilikti atqarýshy organdar anyqtaıdy. Jeke quram men áskerı tehnıkany jumys barysynda áskerı polısııa alyp júredi. Búginge deıin Nur-Sultan jáne Almaty qalalarynda vırýsty juqtyrý qaýpi bar 80-nen astam nysan óńdeldi.
El Prezıdentiniń Tótenshe jaǵdaı rejimin qamtamasyz etý jónindegi memlekettik komıssııanyń otyrysynda Qarýly Kúshterdi kóshelerdi dezınfeksııalaýǵa tartý jónindegi tapsyrmasyna sáıkes, iri eldi mekenderde de atalǵan jumystar uıymdastyrylýda. Atap aıtqanda, áskerı qyzmetshiler tıisti jergilikti atqarýshy organdardyń jospary boıynsha Shymkent, Aqtaý, Aqtóbe, Atyraý, Qaraǵandy, Qyzylorda, Taraz jáne basqa qalalarda nysandardy arnaıy óńdeýge kiristi. Osy maqsatta Qorǵanys mınıstrligi bıologııalyq qorǵaý bólimsheleriniń sanyn ulǵaıtpaq.
Jalpy, elordada qala kósheleri, trotýarlar, aıaldamalar jáne basqa da qoǵamdyq oryndar kúndelikti arnaıy eritindilermen dezınfeksııalanýda. Qoldanylyp jatqan eritindi adamdar men janýarlar úshin qaýipsiz. Qala aýmaǵyn eritindimen óńdeýge kún saıyn 450 adam qatysady. Sondaı-aq áýejaıda, vokzaldarda, áleýmettik nysandarda, bazarlarda, saýda oıyn-saýyq ortalyqtarynda jáne basqa da adam kóp jınalatyn jerlerde dezınfeksııalaý sharalary, sanıtarlyq tártip kúsheıtildi. Jumys oryndary men ǵımarattarda muqııat óńdeý júrgizilip jatyr. Qyzmetkerler medısınalyq maskalarmen, antıseptıktermen jáne basqa da medısınalyq qorǵanys quraldarymen qamtamasyz etilgen. Jospar boıynsha 2 myńnan astam turǵyn úı dezınfeksııadan ótýi qajet. Páter ıeleri kooperatıvteri men qyzmet kórsetýshi kompanııalar úılerdiń kireberisterin, esikterdi, lıftilerdi, súıenishterdi, tereze jaqtaýlaryn jáne t.b. dezınfeksııalaýǵa mindetti. Elordada koronavırýs ınfeksııasynyń taralýyna jol bermeý boıynsha barlyq sharalar qabyldanyp jatyr. Jedel shtab jumys isteıdi. Qala turǵyndary tártipti saqtap, qajetsiz úıden shyqpaýy, barlyq qaýipsizdik sharalaryn saqtaýy qajet, dep habarlady qala ákimdigi.
Al Almaty qalasynda úılerdiń kireberisi men qoǵamdyq oryndardaǵy dezınfeksııalaýdan soń turǵyndardyń qaýipsizdigi maqsatynda páterden bes saǵat kóleminde shyqpaýdy ótingen habarlama taratyldy. Sondaı-aq óńdeý jumystary aldyn ala daýys zoraıtqyshpen habarlanady, al óńdeýden soń kireberisterge kelesi dezınfeksııalaý sharasynyń kestesi ilinedi. Shaharda barlyǵy 2868 úıdegi 8633 kireberisti arnaıy eritindimen óńdeý josparlanǵan. Sonymen birge qala ishindegi ózenderdiń jaǵalaýlary da óńdelmek.
