17:32
Ulybrıtanııa premer-mınıstri koronavırýs juqtyrdy
Premer-mınıstr keńsesi Borıs Djonsonnyń vırýs juqtyrǵanyn málimdedi.
Habarlamada indet belgileri jeńil ekeni aıtylǵan, sondaı-aq ol Daýnıng-strıtte oqshaýlanady.
Ol Anglııanyń bas dárigeri, professor Krıs Ýıttıdiń jeke keńesi boıynsha koronavırýsqa test tapsyrǵan.
Borıs Djonson áli de Úkimettiń daǵdarysqa qarsy áreketin júrgizetin bolady.
Elde barlyǵy 11,816 adam vırýs juqtyrǵan jáne 580 naýqas indetten kóz jumdy.
Twitter paraqshasynda jarııalaǵan habarlamasynda Borıs Djonson halyqty úıde otyrýǵa shaqyryp, «birge jeńiske jetetinimizge senimdimin» dep jazdy.
17:05
Iranda ólim sany azaımaı tur
Eldiń densaýlyq saqtaý mınıstrliginiń málimetinshe, Iranda aýyrǵandar sany 32 332 adamǵa deıin ósti, al qaıtys bolǵandar sany 2378-ge jetti.
Sońǵy bes kún ishinde qaza bolǵandar sany ósip keledi.
• 26 naýryz - 157 adam
• 25 naýryz - 143 adam
• 24 naýryz - 122 adam
• 23 naýryz -127 adam
• 22 naýryz -129 adam
16:19
Qyrǵyzstanda vırýs juqtyrǵan 14 naýqas anyqtaldy, barlyǵy 58 jaǵdaı
Bul týraly búgin brıfıngte eldiń Densaýlyq saqtaý mınıstrligi Qoǵamdyq densaýlyq saqtaý basqarmasynyń basshysy Aınýr Aqmatova habarlady.
Onyń aıtýynsha, onyń ishinde 7 jaǵdaı Jalal-Abad oblysy Sozaq aýdanynda jáne 7 jaǵdaı Osh oblysynda tirkelgen.
Indet juqtyrǵan bes azamat shaǵyn qajylyqtan oralǵan jáne 9-y olarmen baılanysta bolǵan.
Qyrǵyzstanda barlyǵy COVID-19 dıagnozy rastalǵan 58 adam tirkelgen.
Jalal-Abad oblysynda 27 adam, Osh oblysynda 26 adam, Bishkek qalasynda 4 adam, Batken oblysynda 1 adam bar.
15:28
Vırýs Afrıka qurlyǵynda taralýda
Covid-19 Afrıka qurlyǵynda keńinen taralyp jatyr. Qazirgi ýaqytta 3243 adam indet juqtyrǵan jáne 83 ólim tirkeldi.
Vırýs juqtyrǵandar sany az bolǵanymen, sarapshylar anyqtalmaǵan naýqastar budan da kóp bolýy múmkin ekenin aıtyp otyr. Sebebi, Afrıka elderinde jasalyp jatqan test sany az eken.
DDSU men sala mamandary medısınasy ortasha deńgeıdegi elderde jaǵdaı ýshyǵýy múmkin ekenin eskertip keledi.
Ońtústik Afrıkada COVID-19 vırýsynan alǵashqy qaza bolǵandar belgili boldy. Bul eki derek Batys Keıpte tirkelgen.
13:37
Úndistan 21 kúndik karantın jarııalady
Jaqynda qatań sharalar engizgen elderdiń qataryna Úndistan da qosyldy. Seısenbi kúni eldiń premer-mınıstri 21 kúndik karantın jarııalady. Elde vırýs juqtyrǵandar sanynyń azdyǵyna qaramastan, mamandar arnaıy shara qabyldanbaǵan jaǵdaıda álemdegi halyq sany kóp elderdiń biri Úndistandy úlken qater kútip turǵanyn eskertti. Qazir elde 657 jaǵdaı tirkelgen, dese de kórshiles Pákistanda vırýs juqtyrǵandar sany myńnan asqan.
12:02
О́zbekstanda vırýstan alǵashqy naýqas kóz jumdy
26 naýryzda Namangannyń 72 jastaǵy turǵyny koronavırýsty ınfeksııamen oblystyq juqpaly aýrýlar aýrýhanasyna jatqyzyldy.
Ol 12 naýryz kúni Túrkııadan oralyp, vırýs juqtyrǵany belgili bolǵan qyzymen baılanysta bolǵan.
Densaýlyq saqtaý mınıstrliginiń aqparaty boıynsha, naýqas kóp jyldar boıy dıabetten, sozylmaly júrek dertinen jáne basqa da aýrýlardan emdelip kelgen.
Ol 27 naýryz kúni tańerteń saǵat 4:30-da mıokard ınfarktinen qaıtys boldy delingen habarlamada.
Elde vırýs juqtyrǵandar sany 83-ke jetti.
Sondaı-aq koronavırýs juqtyrǵan 15 ózbekstandyqtan pnevmonııa anyqtalǵan, 7-i aýyr jaǵdaıda. Bul týraly memlekettik sanıtarlyq-epıdemıologııalyq baqylaý ınspeksııasynyń bastyǵy Nurmat Otabekov málimdedi.
09:49
AQSh-ta koronavırýs juqtyrǵandar sany Qytaıdan asyp ketti
Johns Hopkins University (JHU) usynǵan aqparatqa sáıkes, AQSh koronavırýs juqtyrǵan turǵyndar sany boıynsha álemdegi birinshi elge aınaldy. Qazir elde 85,653 jaǵdaı tirkeldi. Bul Qytaıda anyqtalǵan naýqastardan 4 myńǵa kóp.
Álemde koronavırýs pandemııasyna qarsy kúreste áreket etýge keshikken elder qatarynda AQSh ta boldy.
Eldegi ólim sany 1,290-ǵa jetti, bul - Italııa (8,215) men Qytaıdan (8,215) keıingi úshinshi kórsetkish.
Vıse-prezıdent Maık Pens qazirgi ýaqytta koronavırýsqa arnalǵan testter barlyq 50 shtatta qol jetimdi ekenin jáne búkil el boıynsha 552 000-nan astam test júrgizilgenin málimdedi.
Prezıdent Tramp anyqtalǵan jaǵdaı elde jappaı júrgizilip jatqan testileýdiń arqasy dep otyr.
Donald Tramptyń daǵdarysty ıgerýde kesh qalǵanyn aıtyp, ony synap jatqandar da kóp.
Vırýstyń eń kóp taraǵan aımaqtary elde adam tyǵyz ornalasqan Nıý-Iork, Nıý Orlean sekildi qalalar bolyp otyr.
Keshe ǵana Qytaı men Italııadan keıin vırýs kóp taraǵan úshinshi el bolǵan AQSh, búgin tańerteń koronavırýstyń jańa epısentrine aınaldy.
09:22
Álemdegi qazirgi jaǵdaı
26 naýryz qysqasha:
• Úndistan 21 kúndik karantın jarııalady
• Italııa men Ispanııada indetten qaza bolǵandar sany Qytaıdan asyp ketti
• Máskeýde qoǵamdyq oryndar jabylady
• Iranda bir táýlikte 157 adam kóz jumdy
• Italııada indetti jeńgen jasy eń úlken naýqas 95-te
