Alaıda, myna máseleni alǵa tarta ketken jón, bul kúnderi qalada dezınfeksııalaý isin tıimdi júrgizýde kedergiler bar.
Quzyrly mekemelerdiń aıtýynsha, qala ákimdi kóppáterli úılerdi dezınfeksııalaýdy 25 naýryzdan bastady. Jáne kireberisterdi zalalsyzdandyrý úsh bólikke bólingen, ıaǵnı kún saıyn biri bóligi tazaryp otyrý tıis. Alaıda, keste boıynsha podezderdi jyldam dezınfeksııalaýǵa kóp jaǵdaıda turǵyndardyń ózi kedergi keltiredi. Sertıfıkat talap etedi, kirgizbeıdi. «Suıyqtyqty kóz aldymyzda aralastyr nemese ıisi nashar, basqasymen tazala» sııaqty jáıtter jıi qaıtalanady. Sondyqtan da brıgadalarǵa túnimen júrýge týra keledi.
Kerisinshe, qala turǵyndarynan «Dezınfeksııa jumystary qalaı-bolsa solaı, salaq oryndalyp jatyr. Turǵyndarǵa úıden shyqpa dep habarlap jatqan joq. Úndemeı kelip ár jerge bir seýip ketken. Onysy qur sý sııaqty, múldem ıisi joq» degen shaǵymdar da bar.
Sonymen, Turǵyn úı saıasaty basqarmasy koronavırýstyq ınfeksııanyń taralýyna jol bermeý úshin azamattardy qabyldaýdy ýaqytsha toqtatty, keńes berý jáne qujattardy qabyldaý onlaın-rejımge aýystyryldy. Azamattardyń qolaılylyǵy úshin osy maqsatta basqarma ǵımaratynyń 1-qabatynda ınternetke shyǵatyn kompıýterlermen jabdyqtalǵan ýaqytsha oryndar uıymdastyryldy.
Bul rette, Basqarmanyń barlyq ǵımaraty boıynsha árbir 2 saǵat saıyn dezınfeksııalaý quraldaryn paıdalana otyryp, sanıtarııalyq tazartý júrgiziledi. Sonymen qatar, antıseptıkalyq quraldary bar sanıtaızerler men dozatorlar ornatyldy.
Basqarma qyzmetkerleri basshylyq quramdy qospaǵanda, aýysymdyq jumys rejımine aýystyryldy.
Aýdan ákimi apparattarymen birlesip, Almaty qalasy taýarlar men qyzmetterdiń sapasy men qaýipsizdigin baqylaý departamentiniń ázirlegen algorıtmine sáıkes, tıisti sharalar qabyldaý úshin basqarý organdarynyń (PIK) basshylaryna túsindirý jumystary júrgizildi.
Atap aıtqanda:
- dezınfeksııalaý quraldaryn paıdalana otyryp, jalpyǵa qoljetimdi oryndardy (kireberister, tutqalar jáne t. b.) kún saıyn sanıtarııalyq tazalaý;
- koronavırýsty ınfeksııanyń aldyn alý boıynsha jadynamalardy kire beristerge ornalastyrý;
- aýlalar men aýla aýmaqtaryn dezınfeksııalaý.
Qalada 8494 úıdiń 23 613 podezd jáne 4082 aýla aýmaǵy óńdelgen. Jumystyń úlken kólemin eskere otyryp, barlyq aýdandar boıynsha dezınfeksııalyq óńdeý júrgizý olardyń jalpy sanynan kúnine keminde 33% qamtı otyryp, 3 kúnge bólingen. Sonymen, úıler men aýlalar aptasyna 2 ret keste boıynsha óńdeletin bolady.
2020 jyldyń 26 naýryzynda josparlanǵan (2 792 úıdegi) 8 267 kireberistiń 96,6%-y (7835) jáne 1148 aýla aýmaǵynyń 94,3%-y (1082) óńdeldi. Dezınfeksııa jumystaryna 50 brıgada, shamamen 350 adam jumyldyryldy. Qalǵan jumys kólemi bir kún ishinde aıaqtalady.
ALMATY
