Fransııadaǵy qazaqstandyqtardyń negizgi sanattary – joǵary oqý oryndardyń stýdentteri (171), sonyń ishinde «Bolashaq» jáne «Abaı-Vern» baǵdarlamalarymen jáne jeke bastamamen oqyp júrgender, fransýz kompanııalary men halyqaralyq uıymdardyń qyzmetkerleri, jergilikti azamattar januıalarynyń músheleri. Parıjdan bólek otandastarymyz Lıon, Strasbýrg, Grenobl, Monpele, Lıll jáne t.b. qalalarda turady.
Eki memleket arasyndaǵy tikeleı áýe qatynasy toqtatylǵannan beri (6 naýryzdan bastap) Elshilik Qazaqstanǵa, negizinen «Belavıa» jáne «Aeroflot» kompanııalarynyń reısterimen, 50-den astam otandasymyzdyń jáne basqa da elderden tranzıtpen kele jatqan birqatar qazaqstandyqtardyń elge oralýyna járdemdesti.
Fransııa úkimeti 12 naýryzda turǵyndardyń júrýine qatal shekteýlerdi engizgeninen keıin Elshilik otandastardyń suraqtaryna der kezinde jaýap berý maqsatynda táýlik boıy isteıtin «jedel jeli» ashyp, áleýmettik jelilerde aqparattyq jáne túsindirme jumysyn kúsheıtti.
Otanǵa oralý nemese Fransııadaǵy qazirgi turyp jatqan ornynda oqshaýlaný týraly sheshimdi árbir qazaqstandyq jeke ózi qabyldaıdy. Degenmen, dıplomattar jeke táýekelderin salystyrýǵa shaqyrady. Elge qaıtý jóninde sheshim qabyldanǵan jaǵdaıda dıplomattar shuǵyl ózgerip jatqan ahýalǵa beıimdelgen múmkindikterin izdestirýde kómek kórsetýde.
Elshilik qyzmetkerleri Fransııadaǵy otandastar «sanaǵyn» júrgizýin jalǵastyryp, olarda týyndap jatqan máselelerdi zerdeleýde. Osy oraıda atalǵan memlekette ýaqytsha nemese turǵylyqty turyp jatqan barlyq Qazaqstan azamattaryn konsýldyq esepke turýǵa shaqyramyz. Bul halyqaralyq qaǵıda birinshi kezekte tótenshe jaǵdaılarda qaýipsizdik sharalaryn qamtamasyz etýge baǵyttalǵan.
