Osyǵan baılanysty qala ákimdigi janyndaǵy tótenshe jaǵdaı rejımin qamtamasyz etý jónindegi qalalyq jedel shtab qosymsha shekteý sharalaryn bekitti. Bul shekteý 28 naýryzdan saǵat 00.00-den bastap 2020 jyldyń 5 sáýiri saǵat 23.59-ǵa deıin engizilmek.
«Koronavırýstyń taralýyna qatysty jaǵdaı biz oılaǵannan da aýyr boldy. Qaýipti baǵalamaý –jaýapsyzdyq ári zań buzǵanmen birdeı. Biz vırýsty oqshaýlap, onyń taralýyn boldyrmaý úshin barlyq qajetti sharalardy júzege asyrýdamyz. Bizge tek sizderdiń qoldaýlaryńyz qajet», – dedi qala ákimi Baqytjan Saǵyntaev.
Bekitilgen hattamaǵa sáıkes, qalanyń tynys-tirshiligin qamtamasyz etetin uıymdardan bólek, barlyq uıymdar men kásiporyndardyń jumysy 30 naýryzdan bastap 5 sáýirge deıin ýaqytsha toqtatylady. Bul sanatqa qalalyq basqarý organdary, azyq-túlik, medısınalyq jáne veterınarlyq nysandar, qalanyń tynys-tirshiligi men qaýipsizdigin úzdiksiz qamtamasyz etetin qyzmetter men BAQ kirmeıdi. Qajettilik bolmasa qalada adamdar men jeke kóliktiń júrýine tyıym salynady. Azyq-túlik jáne dári-dármekter alý úshin úıdiń qasyndaǵy dúken men dárihanaǵa barýǵa bolady. Sondaı-aq úı janýarlaryn serýendetýge ruqsat etilgen.
«65 jastan asqan turǵyndardyń kóshege shyqpaýyn suraımyn. Bul rette muqtajdarǵa áleýmettik qyzmetkerler men eriktiler qajetti kómek kórsetedi. Qalada kámeletke tolmaǵandardyń eresektersiz júrýine bolmaıdy», – dedi Almaty qalasynyń ákimi Baqytjan Saǵyntaev.
Sonymen qatar, qoǵamdyq kóliktiń jumys kestesi saǵat 06.00-den keshki 19.00-ge deıin qysqartyldy. Bularda barlyq sanıtarlyq-epıdemıologııalyq normalar saqtalýy tıis. Qoǵamdyq kóliktegi jolaýshylar 40%-dan aspaýy tıis. Sonymen qatar, qaýipsizdik jáne júrgizýshilerdiń koronavırýsty juqtyrý qaýpin azaıtý maqsatynda júrgizýshilerge qoǵamdyq kóliktiń aldyńǵy esikterin ashýǵa tyıym salý týraly sheshim qabyldandy.
Sondaı-aq, qalany dezınfeksııa júrgizilgennen keıin aýqymdy jumystar júzege asyrylatyn bolady. Árbir aýdan boıynsha aýmaqty óńdeýdiń jalpy kestesin aýdan ákimdikteriniń apparattary jáne dezınfeksııalyq óńdeýge tartylǵan basqa da uıymdar júrgizip, retteıdi. Dezınfeksııa júrgizilgennen densaýlyqqa zııan tımes úshin 5 saǵattaı dalaǵa shyqpaý kerek.
«Qoǵamdyq kólik óz jumysyn tańǵy saǵat 06.00-den keshki 19.00-ge deıin jalǵastyrady. Azyq-túlik, dári-dármek jáne birinshi kezekte qajetti zattardy jetkizý qyzmetteri saǵat 9.00-den 22.00-ge deıin qoljetimdi bolady. Barlyq uıymdar, kásiporyndar men qalalyq qyzmetterdiń jumysshylary sanıtarlyq qorǵaý tártibin kúsheıtedi», — dedi B. Saǵyntaev.
Tótenshe jaǵdaı kezinde týystarǵa baryp, qonaq shaqyrýǵa tyıym salynady. Jerleý rásimine qatysatyndar 10 adamnan aspaý kerek. Qala kóshelerinde quqyq qorǵaý organdary men QR Ulttyq gvardııasynyń ókilderi táýlik boıy baqylaıtyn bolady. Tártipke baǵynbaǵandardy ákimshilik jáne qylmystyq jaýapkershilikke tartý kózdelgen.
«Bul sharalardyń barlyǵy qoǵamnyń densaýlyǵyn qorǵap, ál-aýqatyn kóterý úshin júzege asyrylýda.
Bul kúnderi árqaısymyz jeke bastyń ári ujymdyq jaýapkershilikti tanyta bilýimiz tıis. Árkim óziniń gıgıenasyn saqtap, ózin-ózi oqshaýlaý arqyly koronavırýs indetiniń taralýyn boldyrmaýǵa septigin tıgizbek. Birlese biz bul qıyndyqty eńseremiz», – dedi Baqytjan Saǵyntaev.
