Jýyrda «Aýyl» partııasynyń resmı paraqshasy adamzattyń amandyǵyn oılap kúndiz kúlki, túnde uıqy kórmeı tynymsyz eńbek etip jatqan medısına mamandaryn qoldaý maqsatynda «Aq qanatty perishtedeı aq halatty abzal jandar» atty jyr chelendjin qolǵa aldy. Izgi bastamany aýzy dýaly aqyndar bir aýyzdan qoldap, óz óleńderin jedel joldaı bastady.
Tipti chelendjde jarııalanǵan jyr shýmaqtary sazgerlerdiń de shabytyn oıatyp, dúnıege jańa ánder de kele bastady. Atalǵan chelendjdi alǵash qoldaǵan Qazaqstannyń eńbek sińirgen qaıratkeri, aqyn Dáýletkereı Kápulynyń óleńine belgili sazger, ánshi Medet Salyqov án jazdy. Jańa týyndyny Salyqovtar otbasy «Jan izgilerim» degen atpen aq halatty abzal jandarǵa birge shyrqap berdi.
Talantty otbasynyń oryndaǵan áserli ánin ár januıanyń dertke daýa dárigerlerge arnap aıtqan alǵysy dep qabyldaýǵa bolady.
Aıta keteıik, chelendjge qalamy qarymdy aqyndar óńir-óńirlerden óz óleńderin joldap ún qosyp jatyr. Qaırat Asqarov, Birjan Baıtýov, Erbol Beıilhan syndy aqyndardyń óleńderin jurtshylyq jyly qabyldaýda.
