22-29 naýryz aralyǵynda 100-den astam kásipker jaýapkershilikke tartyldy: 98 adamǵa aıyppul salynsa, 5 adam 15 táýlikke qamaýǵa alyndy, taǵy 9 is sotta qarastyrylyp jatyr. Investısııa jáne kásipkerlikti damytý basqarmasynyń basshysy Erlan Bekmurzaev habarlaǵandaı, shaǵyn jáne orta bıznes, iri saýda jelileri ókilderiniń basym bóligi sanıtarlyq normalar men karantın erejelerin ustanyp jatyr.
"Bul bizdi qýantady, biraq zańbuzýshylardy anyqtaý jumystary jalǵasyp jatyr". Esterińizge sala keteıik, Tótenshe jaǵdaı rejımin qamtamasyz etý jónindegi memlekettik komıssııanyń sheshimine sáıkes 28 naýryz saǵat 00.00-den bastap, birqatar qosymsha qatań sharalar bekitildi:
- Azyq-túlik, dári-dármek satyp alýdy jáne jumysqa barýdy qospaǵanda, azamattardyń turǵyn úıden shyǵýyn shekteý;
- Halyq kóp jınalatyn oryndardy jabý (saıabaqtar, skverler, jaıaý júretin kósheler, jaǵalaýlar, oıyn alańdary jáne t. b.);
- Kóshelerde jáne basqa da qoǵamdyq oryndarda úsh adamnan artyq toptasyp jınalýǵa tyıym salý (otbasy múshelerinen basqa); Kámelettik jasqa tolmaǵandardyń úlkendersiz syrtta júrýine tyıym salý.
30 naýryzdan bastap 5 sáýirge deıin avtobýstar júrmeıdi. Dárigerler, polısııa qyzmetkerleri jáne qalanyń tynys-tirshiligin qamtamasyz etetinderden basqasy apta boıy jumys istemeıdi. Elorda ákimdigi koronavırýspen kúresip jatqan medısına qyzmetkerleri úshin qonaq úıler, kólik bólip, tamaq uıymdastyrdy. Emhanalar men aýrýhanalarda jumys isteıtin dárigerler úshin de kólik uıymdastyrylǵan. Kólikti CTS kompanııasy usyndy.
