«О́tpeli synaq sátinde úmitsizdik pen kúızeliske boı aldyrmaı, Allaǵa jaqyndaýymyz qajet. Allaǵa jaqyndaý degenimiz – Onyń jer betine ornatqan zańdylyǵymen júrý. Adam balasynyń Allaǵa degen nyq senimi, ıaǵnı ımany ony kez kelgen tyǵyryqtan alyp shyǵady. Iman shartyn júregine bekitken múmin jaqsylyq pen jamandyq – Alladan dep qabyldaıdy. Nyǵmetke kenelse – shúkir etedi, qıyndyqqa tap bolsa – tózimdilik tanytady. Alla Taǵala qasıetti Quranda: «(Musylmandar) Bosamańdar da qaıǵyrmańdar. Eger múmin bolsańdar, álbette ústem bolasyńdar» («Álı Imran» súresi, 139-aıat), – dep musylman balasyn súıinshilegen. «Aqqa Qudaı jaq» degendeı, osy synaq kezeńinen aq adal nıetimizben aman-esen ótýdi jazǵaı», – dep atap ótti Bas múftı Naýryzbaı qajy Taǵanuly.
