Qazaqstan • 01 Sáýir, 2020

Juqpaly indetten qaıtys bolǵan adamdardyń máıitin jerleý tártibi jarııalandy

266 retkórsetildi

Qazaqstan musylmandary dinı basqarmasynyń Ǵulamalar keńesi óte qaýipti juqpaly týlıaremııa, ebola, koronavırýs, oba, t.b. aýrýlardan qaıtys bolǵan  adamdardyń máıitterin jýyndyrýǵa jáne jerleýge qatysty qandaı sharalar júzege asatynyn jarııalady.

Birinshiden, máıitti jýyndyrý. О́te qaýipti juqpaly dertten qaıtys bolǵan adamdy jýyndyrý rásimi arnaıy memlekettik mekemeniń sanıtarııalyq-epıdemıologııalyq talaptaryna sáıkes júzege asýy tıis. Máıithanada (morg) jýyndyrý sharasy sharıǵat talabyna qaıshy kelmese, máıitti qaıta jýyndyrý shart emes. Qaıtys bolǵan er kisini er kisi, áıeldi áıel jýyndyrýy kerek.

Ekinshiden, máıitti kebindeý. Sharıǵat boıynsha máıit kebindelýi mindet. Er kisi úsh qabat matamen, al áıel bes qabat matamen kebindeledi. Alaıda juqpaly dertten qaıtqan kisini kebindeý isinde sanıtarlyq qaǵıdalar saqtalýy tıis. Eger máıithanada kebindelgen máıit sharıǵatqa saı bolsa, qaıta kebindeý shart emes. Qaıtys bolǵan er kisini er kisi, áıeldi áıel kebindeýi qajet.

Úshinshiden, janaza namazyn oqý. Qaýipti indetke baılanysty jarııalanǵan tótenshe jaǵdaıda janaza namazyna marqumnyń eń jaqyn týystarynyń qatysýy jetkilikti. Saqtyq sharalary úshin adam sanyn barynsha azaıtý qajet. Qalalyq jaǵdaıda indettiń qoǵamdyq ortaǵa (mysaly, kópqabatty úı turǵyndaryna, kórshilerine, t.b.) taralmaýy úshin marqumdy máıithanadan tikeleı zırat basyna aparyp, sol jerde janaza namazyn oqyp, jerleýge sharıǵatymyzda ruqsat etilgen. Janaza rásimderin jergilikti ımam atqarady. Namaz oqyǵan kezde sanıtarlyq normaǵa saı máıit ımam men jamaǵattan qashyq jerge qoıylady.

Tórtinshiden, máıitti jerleý. Máıit zıratqa arnaıy kólikpen jetkizilýi tıis. Máıitti jerleý rásiminde bıoqaýipsizdik sharalary qatań saqtalýy tıis. Sondaı-aq máıit qaıtys bolǵan mekeninde jerlenýi tıis. Sanıtarııalyq-epıdemıologııalyq mekemesiniń ruqsatynsyz máıitti úıine nemese basqa meken-jaıǵa (ózge qalaǵa, týǵan jerine) aparmaǵan durys. Mundaǵy maqsat – juqpaly indettiń ózge aımaqtarǵa taralýynyń aldyn alý.

Eskertý: Sanıtarııalyq-epıdemıologııalyq mekemesi tarapynan máıitti sharıǵat jolymen jýyndyrýǵa, taıammým aldyrýǵa jáne kebindeýge ruqsat berilmese, mundaı jaǵdaıda sharıǵattyń zárýlik úkimi negizge alynady. Máıithanada oralǵan mata, arnaıy úldir (klıonka) nemese tabyt ashylmastan, sol hálinde janaza namazy máıitten alys turyp oqylady.

 

 

Sońǵy jańalyqtar

Jitiqaraǵa jańa reanımobıl berildi

Aımaqtar • Búgin, 19:25

Pavlodarda ekobazar ashyldy

Aımaqtar • Búgin, 17:09

Almatyda keıbir kósheler jabylady. Nege?

Aımaqtar • Búgin, 15:50

Jol qurylysyna monıtorıng júrgizilýde

Aımaqtar • Búgin, 14:45

Uqsas jańalyqtar