Eń kóp zardap shegip jatqandar kimder? On myńdaǵan, júz myńdaǵan qarapaıym adamnyń taǵdyry neshik?
Qazir osyndaı qarapaıym suraqtardyń ózine jaýap tabý, aldaǵyny boljaý ońaı bolmaı otyr. Qarjy sarapshysy Andreı Chebotarev, Reseıdegi jaǵdaımen salystyra otyryp, erteńimizdi bajaılap kórdi. "Saýda-ónerkásip palatasy Reseı ekonomıkasynyń koronavırýstan kelgen shyǵynyn eseptedi. 8,6 mıllıon adam jumyssyz qalǵan, 3 mıllıon kásipkerdiń sharýasy kúıregen. Shaǵyn bıznes ókilderiniń úshten biri ǵana bir toqsannan ary merzimge shydaı alatynyn aıtqan" - deıdi, Andreı Chebotarev.
Reseı men bizdiń ekonomıka qurylymy uqsas. Qazaqstanda qazir 8,8 mıllıon adam jumys istese, 12 paıyzdyq tómendeýdi eskere otyryp, 1 mıllıon adam jumysynan aırylady dep boljaýǵa bolady. Qazir Qazaqstanda 841 myń jeke kásipker tirkelgen. Olardyń 75 paıyzy shydaı almaıdy desek, onda 640 myń kásipker bankrotqa ushyraıtyn bolady.
Ár jeke kásipker ózinen bólek keminde 2 adamǵa jumys berip otyrǵanyn eskersek, onda 3 mıllıonǵa jýyq adam tabysynan aırylyp, daǵdaryspen betpe-bet keletin bolyp tur. Osy 3 mıllıonnyń otbasy, bala-shaǵasy bar. Nátıjesinde shamamen 9 mıllıon adam kúızeliske ushyramaq. Bul Qazaqstannyń teń jartysy.
"Bizdi koronavırýs óltirmese, odan keıin keletin ashtyq óltirýi múmkin" - deıdi, sarapshylar. Amerıka Qurama Shtattarynyń karantındi qatańdatýdan úzildi-kesildi bas tartyp otyrǵany da sodan. Ondaǵy ekonomıka ınstıtýttary karantındi sozǵandaǵy shyǵyndy aldyn-ala eseptegenniń ózinde jaǵa ustaǵan bolatyn.
