Qashyqtan oqytý úshin ár mektepke júrgizilgen monıtorıng oqýshynyń úıinde ınternettiń, kompıýter, noýtbýk, planshettiń bar-joǵyn anyqtady. Smartfony bar oqýshylar sany naqtylandy. Múmkindigi joq oqýshylardyń tizimi jasalyp, kóp balalylarǵa, birneshe balasy mektepte oqıtyn úılerge kompıýter, planshetti mektep bere bastady. Biraq, oqýshy mektep múlkine asa muqııat qaraý kerek.
Múldem ınterneti joq aýyldar ne isteıdi?
Shalǵaıdaǵy aýyldyq eldi mekenderde ornalasqan mektepter barlyq saqtyq sharalaryn saqtaı otyryp, oqýdy kúndizgi nysanda jalǵastyrylatyn bolady jáne qatań sanıtarlyq-epıdemıologııalyq talaptarǵa sáıkes oqıdy.
Ár aýdan ákimdigi epıdemıologııalyq ahýaldy eskere otyryp jergilikti Taýarlar men kórsetiletin qyzmetterdiń sapasy men qaýipsizdigin baqylaý bólimderiniń kelisimi boıynsha oqytýǵa sheshim qabyldaıdy.
Bul mektepterde sabaqtyń uzaqtyǵy – 30 mınýttan júrgiziledi.
Oqýshylarǵa
Qashyqtan oqytý bastalǵan sátte oqýshylar bekitilgen kestege qarap, televızııadaǵy beınesabaqtardy ýaqytyly, muqııat tyńdap, tapsyrmalardy oryndaý kerek. Internet platformadaǵy resýrstarǵa kirip, tapsyrmany alýdy úırenip, túsinbegen suraqtardy Whats App arqyly muǵalimge tikeleı qoıýy kerek. Vıdeobaılanysqa shyqqan ýaqytta da ustazdardyń aıtqan merziminde kirip, ýaqytty únemdeýdi úırený kerek. Bul keıin problema týyndamaýy úshin aıtylyp otyr.
Muǵalimderge
Oqýshylardyń ýaqytyly sabaqty meńgerýi, televızııadaǵy sabaqty kóre alýy, ınternet-platformaǵa emin-erkin tirkele alǵanyn baqylaýy kerek. Úı tapsyrmasyn oryndaýy, jańa sabaqty meńgergenin «Kúndelik» júıesimen, WhatsApp jelisimen keri baılanys arqyly rettep otyrýy tıis. Sol úshin de aılyq jalaqysy tolyq saqtalyp otyr. Baǵa qoıý, ata-analardyń habardar bolyp otyrýyna asa mán berý suralady.
Aty-analarǵa
Balasynyń ýaqytyly sabaqty oryndaýy, televızııadaǵy sabaqty kestege sáıkes kórgenin jáne ınternetpen jumys isteýin baqylaýǵa alsa, muǵalimmen únemi baılanysta bolsa oqytý áldeqaıda jeńil bolady. Bul ata-analardy mindetteý emes, balasy úshin osy jaýapty sátte ustazdarǵa kómek berý dep túsingen durys.
P.S Qashyqtan oqytý bastalǵan sátte túrli suraqtar jáne ýaqytsha qıyndyqtar bolýy múmkin. Sol úshin de baıbalam salyp, kópti shýlatyp emes, tıisti synyp jetekshisine ne mektep dırektoryna máseleni jetkizse, oqytý oıdaǵydaı bolady. Tipten qıyndasa Bilim basqarmasyna, aýdan, qalalyq bilim bólimderi arqyly suraqty qoıyp, birge sheshýge yqpal jasasaq mundaı synaqtan syr bermeı shyǵamyz.
