О́z sózinde Marat Jumanqulov quqyq qorǵaý organdarynan azamattardyń dárigerlerdiń zańdy talaptaryna baǵynbaýyna qatysty máselelerdi sheshýge atsalysýyn surady. Mundaı oqıǵa Qordaı aýdanynda oryn alǵan. Ondaǵy turǵyn tek uzaq áńgimelesýden keıin ǵana aýrýhanaǵa barýǵa kónip, qajetti taldaýlardy tapsyrǵan. Abyroı bolǵanda taldaý nátıjesi teris bolyp shyqqan. Al eger jaǵdaı basqasha bolǵanda, onda másele tipti kúrdelene túsýi múmkin eken.
Shtab basshysy Berdibek Saparbaev oblystyq polısııa departamenti bastyǵynyń orynbasary Temirbek Orazymbetovke naqty tapsyrmalar júktedi. О́zine de, aınalasyndaǵylarǵa da qaýip tóndirgen, tótenshe jaǵdaı rejimin buzǵan adamdarǵa qatysty zańdy jazalaý sharalaryn qoldanýdyń mańyzdylyǵyn basa aıtty. Bul tapsyrma Jýaly aýdanynyń ákimi Narbaı Ergebekovke de qatysty edi. Atalǵan aýdanǵa qarasty aýyl turǵynynyń kókpardan jarys ótkizbek bolǵandyǵy anyqtalyp, ol ýaqytsha ustaý ızolıatoryna 7 kúnge qamaqqa alynǵan. Sondaı-aq, jıynda kásipkerlik jáne ındýstrıaldy-ınnovasııalyq damytý basqarmasy basshysynyń mindetin atqarýshy Jandáýlet Kenjebekovtiń azyq-túlik taýarlarynyń baǵasyn ustap turý jónindegi jumystarynyń nátıjesizdigin Berdibek Saparbaev synǵa aldy. «Búgingi tańda halyqty alańdatyp otyrǵan basty máselelerdiń biri – baǵa turaqsyzdyǵy. Siz ózińiz eki apta ishinde negizgi azyq-túlik taýarlarynyń qunynyń ne sebepti ósip otyrǵanyna taldaý júrgizip kórdińiz be? Baǵanyń ósýi kóptegen saýda jelilerinde baıqalýda. Basqa ónimder týraly aıtpaǵannyn ózinde, eń bolmaǵanda tuz baǵasyn ustap tura almaımyz. Qurylǵan mobıldik toptardyń jumysy sátsiz júrgizildi», dedi ákim.
Jambyl oblysy
