Keshe tikeleı efırde ótken elimizdegi tótenshe jaǵdaıǵa jáne memlekettiń daǵdarysqa qarsy is-sharalaryna baılanysty málimdemesinde Prezıdent Qasym-Jomart Toqaev «Inflıasııanyń artýyna baılanysty zeınetaqy, memlekettik járdemaqy jáne ataýly áleýmettik kómek mólsherin 10 paıyzǵa ındeksasııalaýdy tapsyrdym. Osyǵan oraı, atalǵan sanattaǵy azamattardyń tabysyn arttyrý úshin memleket tarapynan 200 mıllıard teńgeden astam qarajat bólinedi», - dedi.
Ekonomıst Murat Temirhanov áleýmettik tólemder turmysy ortasha halyq úshin aıtarlyqtaı kómek bolady dep esepteıdi. Mysaly 100 myń teńge zeınetaqy alatyndardyń qolyna 110 myń teńge túsedi. Ekonomıst osy tusta, bul qarjy ýaqytsha sharalar emestigin aıtyp ótti. 2-3 aı tólep, jaǵdaı túzelgen toqtap qalmaıdy. Ekonomıst aıtyp ótkenindeı, bıýdjet shyǵyny artatyn bolady. Osy tusta ekonomıst Prezıdent aıtqan 200 mlrd teńge degen sózdi mamandar túsinbeı otyrǵanyn aıtty. «Bul sıfrdyń bul bir jylǵa eseptelgen shyǵyn nemese úsh jyldyq bıýdjettiń shyǵys kózi ekeni anyqtalýy tıis. Tıisti organdar eseptep, jarııa etedi dep oılaımyn. Sebebi, úndeýde bul jaǵy ashyp aıtylǵan joq», - deıdi ekonomıst.
Qarjyger Erlan Ibragım ındeksasııa degen ınflıasııa kúrt ósken jaǵdaıda júzege asatyn shara ekenin, al bizdegi ınflıasııa ár jarty jyl saıyn ózgertilip turatynyn aıtady.
Indeksasııa boıynsha tólemder ýaqytsha emes, sebebi ınflıasııa da ýaqytsha qubylys emes. Taýarlarǵa da baǵa tómendemeıdi, tıisinshe ınflıasııa da artyp otyrady.
Erlan Ibragım, atap ótkendeı, Prezıdent aıtyp otyrǵan 200 mlrd teńge 2020 jyldyń bıýdjetinen osy baǵytqa ketetin shyǵyndar.
«Al 2021-2022 jyldardyń bıýdjetinen qarastyrylatyn qarajat qosymsha túzetý barysynda anyq bolýy kerek. Jalpy, bılik áleýmettik tólemderdi daǵdarys ýaqytynda toqtatpaıtynyn aıtty. Qazir elde 6,5 mln adam osyndaı áleýmettik járdemaqylardy alady. Men 200 mlrd teńgeni osylaı qabyldadym» deıdi Erlan Ibragım.
