Tártip pen tazalyq

Degenmen de biz san qıly zamandy bastan keshirgen, qandaı qıyn kún bolsa da eldigimizdi joǵaltpaǵan halyqpyz. Elimiz bul kúnge berekeli birligimen, tııanaqty tirligimen jetti. Endi osynaý qazynamyzdy, osynaý berekemizdi bir jutta joǵaltyp almaýymyz qajet. Jasyratyny joq, jurt osy kúnderi indettiń lańyn, den­saý­lyǵyn, amandyǵyn bir ýaıym­dasa, kúndelikti tirshiligin, kásibin, sharýasyn eki ýaıym­dady. Árıne «Eń basty baılyq – densaýlyq» desek te, osynaý qysyltaıań sátte kásibin amal­syz toqtatyp, sharýasyn shashyratyp alý adamdardyń erteńge degen senimin de oırandap jiberetini anyq. Tó­tenshe jaǵdaıǵa baılanys­ty jumysynan aıyrylý, ná­paqa­synan qaǵylý, tabysyn jo­ǵaltý, munyń bári jurttyń eńsesin tipten eze túskeni jasyryn emes.

Shynynda koronavırýs – batpandap kirip, mysqaldap shyǵatyn qaýipti dert. Mine, osyndaı almaǵaıyp sátte mem­le­kettiń abdyrap qalmaı, batyl sheshimder qabyldap, halyq­tyń áleýmettik jaǵdaıyn kó­terýge baılanysty naqty qa­damdar jasaýy – eldiń rýhyn kóterdi, senimin oıatty. «Muq­taj adamdarǵa qolushyn bere­miz. Buǵan eshqandaı kúmán bol­maýy kerek. Eń bastysy, shy­damdylyq, tózimdilik jáne jaýapkershilik tanytaıyq. Biz – rýhy asqaq, birligi bekem, eńsesi bıik halyqpyz. Sondyqtan bul synaqtan da súrinbeı ótip, qıyndyqty birge eńseremiz dep senemin. Basty toılarymyz áli alda. Tórt qubylamyz túgel bolsyn, aǵaıyn! Biz birgemiz!» dedi kúni keshegi mańyzdy málimdemesinde Prezıdent Qasym-Jomart Toqaev.

Indetti aýyzdyqtaýda bı­lik pen buqara bir úıdiń bala­syn­daı, bir qoldyń salasyndaı áreket etpese, bul isten oń nátıje shyǵarý qıyn. Son­dyqtan dál osy kezde halyq memleketke qoldaý kórsetýi qajet. Endeshe, tártip pen taza­lyq – basty mindet. Prezıdent ınflıasııanyń artýyna baılanysty zeınetaqy, memlekettik járdemaqy jáne ataýly áleý­mettik kómek mólsherin jyl­dyq ólshemmen alǵanda 10 paıyzǵa ındeksteýdi tapsyrdy. Tabysynan aıy­ryl­ǵan azamattarǵa eń tómengi ja­­laqy mólsherinde qoldaý kór­se­ti­lip, osy kómekti alatyn aza­mattardyń sanaty keńeı­tildi. Endi 42500 teńge kóle­min­degi bul qarajat buryn turaq­ty jumys istep, jalaqy alǵan­darǵa ǵana emes, sondaı-aq ózin ózi jumyspen qamtyǵan já­ne resmı tirkelmeı eńbek ete­tin azamattarymyzǵa da beri­ledi. Osynyń nátıjesinde 3 mıl­lıonǵa jýyq adamǵa kómek kór­setiletin boldy. Sondaı-aq turmysqa qajetti zattar men azyq-túlikti tegin alatyn azamattardyń da sanaty ke­ńeıtildi. Mindetti áleý­met­tik medısınalyq saqtan­dyrý júıesi boıynsha saq­tan­dyrylmaǵan azamattardyń medısınalyq kómek alý qu­qyǵy 1 sáýirden 1 shildege deıin uzartyldy. Iаǵnı, osy saq­tandyrý júıesinde bolý-bolmaýyna qaramastan osy kezeńde azamattarymyzǵa to­lyq medısınalyq kómek kór­setilýi tıis. «Aldaǵy ýaqytta mun­daı kómekti zattaı emes, aza­mat­tardyń ózderi tańdap, satyp alýy úshin qarjylaı be­rýge kósh­ken jón», dedi Pre­zıdent.

Jasyratyny joq, el ekonomıkasynda sheshilmegen máse­leler əli de kóp. «Jaý jaǵadan alǵanda bóri etekten» degen, el aýrýmen álek bolyp jatqanda dollar baǵamynyń kóterilip ketýi jurttyń senimin tipten ári-sári ete túskeni anyq. Áıtse de rýhy asqaq, birligi bekem, eńsesi bıik halyq qana osynaý synaqtan súrinbeı ótedi. Endeshe, Prezıdent aıtqandaı, basty toılarymyz áli alda. Qıyndyqty birge eńsereıik.