Buǵan deıin mundaǵy úılerdiń aýmaǵynan koronavırýs indetin juqtyrǵan 2 turǵyn anyqtalǵan bolatyn. Keshe «Asyl Armanǵa» arnaıy kelgen oblys ákiminiń orynbasary Batyrjan Baıjumanov pen oblystyń bas sanıtarlyq dárigeri Qaırat Baımuhambetov turǵyndarmen kezdesip, qaýipsizdik sharasynyń kúsheıtiletinin túsindirgen edi. Qazir aýmaq qorshaýǵa alynyp, turǵyn úı kesheni tolyqtaı oqshaýlanǵan. Adamdardy qajetti azyq-túlik, basqa da zattarmen qamtý erekshe tártippen júrgiziledi. Turǵyndardyń densaýlyǵyn arnaıy ashylǵan sanıtarlyq beket pen dárigerlik ambýlatorııa tekserip, qadaǵaalýǵa kirisken. Syrtpen baılanystyń aldyn alý úshin «Asyl Armanǵa» polısııa men áskerı bólim sarbazdary kirdi.
Aıtpaqshy, osy turǵyn úı kesheninen anyqtalǵan naýqastardyń jaǵdaıy qalypty. 1995 jyly týǵan kelinshektiń aıaǵy aýyr, ol Qaskeleńdegi juqpaly aýrýlar aýrýhanasynda dárigerlerdiń baqylaýynda. Keshe anyqtalǵan 1959 jylǵy áıel indet juqtyrǵan naýqaspen qarym qatynasta bolǵan.
Jalpy, búgingi derek boıynsha Almaty oblysynda koronavırýs ınfeksııasyn juqtyrǵan 9 adam anyqtalǵan.
