«Elde koronavırýs indetine qarsy sharalar qolǵa alynyp, arnaıy qurylǵan Memlekettik komıssııa jumysyn bastaǵan sátten Mádenıet jáne sport mınıstrligi shet memleketterde jáne elimizde josparlanǵan mádenı, sporttyq is-sharalaryn shektep, qaýipsizdikke asa mán berdi. Sportshylarymyz ben óner qaıratkerleriniń shetelderge shyǵýyna der kezinde toqtaý qoıylyp, barlyq el azamattarynyń saqtyq sharalaryna nazar aýdarýǵa shaqyrdyq», - dedi mınıstr.
Mınıstrdiń aıtýynsha, tótennen kelgen bul indet qazir tek Qazaqstan emes, barlyq álem jurtynyń jumys josparyna, ómir súrý daǵdysyna ózgeris engizýge májbúrledi. Kúni keshe Memleket basshysy Qasym-Jomart Toqaev elimizdegi tótenshe jaǵdaıǵa jáne memlekettiń daǵdarysqa qarsy is-sharalaryna baılanysty arnaıy málimdeme jasap, aldaǵy is-sharalar josparyn bekitip berdi.
Sondaı-aq mınıstr bul sharalardyń tııanaqty oryndalyp, elimizdiń osy bir qysyltaıań shaqtan qınalmaı shyǵýyna mádenıet jáne sport, týrızm ókilderi belsene at salysatynyn jetkizdi. Prezıdent aıtqan qoldaýlar qoǵamnyń barlyq salasyn qamtıtyn sátte eshkimniń nazardan tys qalmaıtynyn atap ótti.
«Mádenıet jáne sport mınıstrligi óner men sporttyń barshaǵa qoljetimdiligin qamtamasyz etý maqsatynda onlaın nusqadaǵy jumys tártibine kóshti. Barlyq respýblıkalyq óner oshaqtary kestege sáıkes kún saıyn qoıylymdaryn, onlaın rejımde óz saıttarynda, YouTube arnalarynda jáne áleýmettik jelilerde kórsetip keledi. Jalpy respýblıka boıynsha mádenıet jáne sport mekemeleriniń qyzmetkerleriniń 90%-y qashyqtan jumys rejımine aýystyryldy. Kún saıynǵy tańǵy 8-den bastap keshki 9-ǵa deıin mádenıet jáne sport ókilderi qazaqstandyqtarǵa úıden shyqpaı, boı jazý jattyǵýlaryn jasap, túrli kezdesýler, onlaın leksııalar, konsertter ótkizip jatyr», - dedi mınıstr.
Keshki ýaqytta mádenıet maıtalmandary kórermenderimizge ásem ánderi men áýezdi kúılerin, kıno jáne teatr qoıylymdaryn kórsetip keledi.
«Jalpy mınıstrliktiń bastamasymen qolǵa alynǵan jańa formattaǵy jumys tártibi búgin de jalǵasyp, qazir jergilikti ónerpazdardyń qatysýymen onlaın kezdesýler, leksııalar, konsertter de ótip jatyr. Sońǵy 10 kúnniń ishinde 600-ge jýyq onlaın nusqadaǵy sharalar ótkizilip keledi», dedi A. Raıymqulova.
