Bilim • 02 Sáýir, 2020

Qaraǵandy oblysynyń mektepteri qashyqtan oqytýdy bastaıdy

9 retkórsetildi

Koronavırýsqa qatysty májbúrli túrde kanıkýlǵa ketken mektep oqýshylaryna «tyqyr» taıandy. Endi, olar tórtinshi toqsan bastalysymen qashyqtan oqı bastaıdy.

Jalpy, oqytýdyń mundaı tyń tásiline kóshýge Qaraǵandy oblysyndaǵy mektepterdiń qanshalyqty deńgeıde daıyn ekendigin atalǵan vedomstvonyń basshysy Esenǵazy Imanǵalıev aıtyp berdi.

– Sáýirdiń 6-nan bastap  oblystaǵy bilim berý mekemeleri qashyqtan oqytýǵa kóshedi. Bul is-shara 155 095 oqýshysy bar qalalyq 208 mektepti jáne 38 519 bala bilim alatyn aýyldyq jerlerdegi 168 mektepti qamtıdy. Sabaqtar Google Classroom, Daryn, online.kz, Edupage.org, Moodle jáne Zoom platformalarynda ótedi, – dep málimdedi ol.

Aıta ketetin bir jaıt, oblystyń  aýyldyq jerlerdegi 131 mektebi  oqytýdy dástúrli túrde jalǵastyra beredi. Bular óńirdiń shalǵaı aýdandaryndaǵy bilim oshaqtary. Munda  oqýshylar sany 80 baladan kem jáne olar eki aýysymda oqıtyn bolady. Mektepterde kabınettik júıe toqtatylady jáne ǵımarattardyń óz ishinde sanıtarlyq tazalyq tártibi qatań túrde kúsheıtiledi.

Qashyqtan oqytý úshin eń aldymen ınternet jáne gadjetter men kompıýterlerdiń kerek ekendigi belgili. Sol sebepti, qazirgi tańda óńirde barlyq muǵalimder men oqýshylardy qajetti quraldarmen, sondaı-aq ınternetke úzdiksiz qoljetimdilikpen qamtamasyz etý jolyndaǵy jumystar qolǵa alynyp jatyr.

Mysaly, qazir jergilikti atqarýshy bılik kompıýterler men planshetter satyp alýǵa 377 mln teńge bóldi. Bul qarajatqa oblystyń segiz aımaǵy úshin 2 409 kompıýter men planshet satyp alý josparda bar.

Jalpy alǵanda, búgingi kúnde oblys muǵalimderiniń 92,5 %-y qashyqtan sabaq júrgizýge ázir. Sonymen birge óńirdegi oqýshylardyń 95,1% kompıýterlermen jáne gadjettermen qamtamasyz etilgen.

Qazir oblystaǵy uıaly baılanys operatorlarymen qashyqtan oqytý kezeńinde jelige qosylý problemalary bar oqýshylarǵa tegin negizde mobıldi ınternet qyzmetin usyný týraly kelissózder júrgizilýde. Negizinde óńirdiń barlyq ınternet-provaıderlerimen arada nól jáne mınýsqa jetken balansta da paıdalanýshylardy qyzmetten ajyratpaý jóninde ýaǵdalastyq bar.

Qýanarlyq bir jaıtty aıta ketý kerek: oblystyq sıfrlandyrý basqarmasynyń basshysy Rýstam Baıjanov jelige túsetin júktemege qaramastan, qashyqtan oqytýǵa kóshýge baılanysty ınternet irkilissiz jumys isteıtin bolady dep sendirdi.

Sońǵy jańalyqtar

Eldik nyshandar tarıhy

Qazaqstan • Keshe

Uqsas jańalyqtar