О́mirden kóshse de, kóńilden óshpeıtin dara daryn ıesin ónerdegi jolyn jalǵaǵan izbasarlary tebirene eske aldy. Aıryqsha bastamany alǵashqylardyń biri bolyp bastaǵan halyqaralyq baıqaýlardyń laýreaty Farhat Kýbıev basqa da qanattastaryn osy estafetany jalǵaýǵa shaqyrdy. Tilendıev ánderin tamyljyta oryndaǵan ónerpazdardyń ónerin jeli arqyly tamashalaǵan tyńdarmandar olarǵa alǵysyn jaýdyryp jatyr. Nurǵısa álemin ónerdegi joldaryna baǵdarsham dep biletin talant ıeleri kórermen kóńilinde qalyqtaǵan aqqý án ólmese dep tileıdi.
– Tilendıev qazaq mádenıetiniń qaıtalanbas tulǵasy. Onyń áni júregimizde, kúmbirlegen kúıleri kóńil tórimizde qattalyp tur. Basty maqsat - eldiń rýhyn, ónerge degen yqylasyn oıatý, halqymyzǵa kóterińki kóńil-kúı syılap, tótenshe jaǵdaıdy eńserýine demeý bolý. Elimizdiń barlyq óńirindegi ónerpazdar bul sharaǵa qoldaý kórsetedi dep senemin, – deıd Jambyl atyndaǵy Qazaq memlekettik fılarmonııasynyń baspasóz hatshysy Manar Alıeva.
Dańqty sazgerdiń týǵan kúnine josparlanǵan birqatar sharalar tótenshe jaǵdaıǵa baılanysty keıinge shegerilgen bolatyn. Osy oraıda, Nurǵısa Tilendıev muralaryn nasıhattaýda Jambyl atyndaǵy Qazaq memlekettik fılarmonııasy aýqymdy bastamalardy qolǵa alyp otyrǵanyn aıryqsha ataı ketken jón. Kúz aılarynda óner ujymy uly tulǵanyń 95 jyldyǵyna arnalǵa úlken konsert ótkizemiz dep josparlap otyr.
