Osyndaı qysyltaıań shaqta, atadan qalǵan asyl qasıetterdi azyq etip, sabyr men saqtyqty sanamyzǵa tereń sińirsek qana dúrbeleń týǵyzǵan qaýipti dertten arylamyz. Eń áýeli, tónip turǵan tótenshe jaǵdaıda adal rızyqty arqaý etýge shaqyramyn. Ultymyzdyń uly aqyny Abaı Qunanbaıuly óziniń 33-qara sózinde «Aldaý qospaı adal eńbegin satqan qoly ónerli – qazaqtyń áýlıesi sol» dep taza nıetpen jasalǵan adal eńbektiń qunyn joǵary qoıǵan. Búgingi kúni tótenshe jaǵdaıdy qaltasynyń qamy úshin paıdalanyp, bazarlar men dúkenderde áleýmettik mańyzy bar taýarlar men azyq-túlikterdiń, dári-dármek pen betperdelerdiń baǵasyn negizsiz kóterý derekteri jıi oryn alýda. Mundaıda qulqynnyń quly bolýǵa emes, halyqqa adal qyzmet qylýǵa umtylýymyz asa mańyzdy bolyp otyr. Túrki áleminiń kómbe tarıhynda ataqty Bilge qaǵan atanǵan Kúltegin babamyz sonaý yqylym zamannyń ózinde «Halqyna begi, begine halqy sengen el uzaqtaý jasaıdy» dep halyq pen memleket arasynda ornaǵan senimniń sarqylmas qýatqa ıe ekendigin bildirgen. Rasynda, memleket saıasatyna rýhanı senim bolmaǵan jerde, nátıjeli istiń boı kórsetýi de ekitalaı ekendigi belgili. Sol úshin de, tótenshe jaǵdaıda qabyldanǵan sheshimder men bastamalardyń barlyǵy tek halyqtyń qamy men el azamattarynyń saýlyǵy úshin jasalyp jatqandyǵyna senim bildirýimiz qajet.
Jer betindegi túrli halyqtarmen tilimiz de, dinimiz de, dilimiz de, túrimiz de bólek bolǵanmen, ortaq bir dúnıemiz bar. Ol jumyr et júregimizden tógiletin – meıirimdilik qasıetimiz. Meıirimdilik pen rahymdyq qana álem halqyn bir arnada toǵystyrady. Osyndaı sátte, júregimiz meıirimge, kóńilimiz keńpeıildilikke tunyq bolǵany jón. Osy oraıda Sybaılas jemqorlyqqa qarsy is-qımyl agenttigi Túrkistan oblysy boıynsha Departamentiniń qyzmetkerleri «Meıirimdilik nury» naýqany aıasynda qolǵa alǵan ıgi bastamany jalǵastyryp, ujym óz qamqorlyǵyna alǵan Arys qalasyndaǵy T.Tájibaev atyndaǵy otbasylyq úlgidegi balalar aýylyna arnaıy bardy. Tárbıelenýshilerdi juqpaly indetten qorǵaıtyn medısınalyq qorǵanys quraldarymen qamtamasyz etti. Mundaı ıgilikti bastamalar aldaǵy ýaqytta da óz jalǵasyn tabatyn bolady. Sondyqtan, qysyltaıań shaqta bir-birimizge qoǵam bolyp qoldaý kórsetýde meıirimdiliktiń jarqyn úlgisi bolaıyq.
El aýmaǵynda jarııalanǵan tótenshe jaǵdaı talaptaryn oryndamaı, salǵyrttyq tanytyp, kópshilik oryndardy erkin kezip, basqa aımaqta toı toılap júrgen el azamattary da barshylyq, ókinishke qaraı. Biri saýda ornyn kórer kózden jasyryp ashsa, endi biri negizsiz taýar baǵasyn ósirýmen álek. Osyndaı olqylyqtar men quqyq buzýshylyqtarǵa jol bermeý úshin Departament janynan arnaıy monıtorıngtik top qurylǵan bolatyn. О́ńirde táýlik boıy júrgizilip jatqan saqtaný sharalarynyń qatańdyǵyn baqylap, blok-beketter men temirjol vokzalyna, ortalyq bazarlar men halyq kóp shoǵyrlanǵan oryndarǵa júrgizilgen monıtorıngtik baqylaý barysynda bazarlarda kórshi oblystardyń kóterme satyp alýshylarynyń iri kólemde azyq-túlikti syrtqa áketýi negizinde áleýmettik mańyzy bar azyq-túlik taýarlarynyń baǵasy 40-60 paıyzǵa qymbattap, taýar tapshylyǵy oryn alǵandyǵy anyqtaldy. Osyǵan baılanysty, búgingi kúni azyq-túlik baǵasyn turaqtandyrý boıynsha qurylǵan jedel mobıldi top naqty sharalar atqarýda.
Hakım KО́ShQALIEV,
Sybaılas jemqorlyqqa qarsy is-qımyl agenttigi
Túrkistan oblysy boıynsha Departamentiniń basshysy, 3-synypty memlekettik ádilet keńesshisi.
