Keshe túnde Densaýlyq saqtaý mınıstrligi Shyǵys Qazaqstannyń bir turǵyny koronavırýs ınfeksııasyn juqtyrǵanyn habarlaǵan bolatyn. Búgin oblystyq Densaýlyq saqtaý basqarmasynyń basshysy Ilııas Muhamedjan derekti rastap, indetke shaldyqqan О́skemen qalasynyń 1938 jyly týǵan turǵyny, áıel adam ekenin aıtty. «Naýqas dárigerler kómegine 1 sáýir kúni júgingen. Aýrýhanaǵa jetkize salysymen naýqasqa rentgenologııalyq zertteýler jasalyp, «pnevmonııa» dıagnozy qoıyldy. Arnaıy algorıtmderge sáıkes biz pnevmonııaǵa shaldyqqan pasıentterge koronavırýsqa qatysty test jasaýǵa mindettimiz. Test oń nátıje kórsetti. Qazir naýqaspen jaqyn qatynasta bolǵan 198 adam anyqtaldy. Olardyń barlyǵy oqshaýlandy. Palatada birge jatqan 4 adamnyń úsheýinen aýrý belgileri tabylǵan joq, tórtinshisin áli tekserip jatyrmyz. Taǵy bir aıtarymyz, koronavırýs juqtyrǵan naýqas qańtar aıynda Reseı Federasııasyna baryp qaıtqan» deıdi basqarma basshysy.
Bul – oblys aýmaǵynda tirkelip otyrǵan úshinshi naýqas. Aıta keteıik, buǵan deıin Semeı qalasynyń eki turǵynynyń indetti juqtyrǵany anyqtalǵan bolatyn.
О́SKEMEN
