«Álemdik órkenıettiń basyna túsken búgingi ekonomıkalyq jaǵdaı barshaǵa ortaq másele.
Osyndaı qıyn kezeńde memleket el azamattaryna áleýmettik, ekonomıkalyq, medısınalyq kómek kórsetý úshin qajetti sharalardy qabyldaýda. Qoǵamnyń ár bir sanatyna qatysty sharalar jeke qaralýda.
Qasym-Jomart Kemeluly óz málimdemesinde shaǵyn jáne orta bıznes ókilderiniń memleket nazarynan tys qalmaıtynyn da basa aıtty. Osy baǵytta Úkimet kelesi sharalardy iske asyrady:
- shaǵyn jáne orta bıznes úshin barlyq salyqtardy tóleý 3 aıǵa – 2020 jylǵy 1 maýsymǵa deıin shegerildi;
- salyq mindetterin qamtamasyz etý sharalary men tásilderin qoldaný, sonymen qatar salyqtyq, kedendik qaryzdar men áleýmettik jarnany tóleýge mindetteý 2020 jylǵy 1 maýsymǵa deıin toqtatyldy;
- tótenshe jaǵdaı kezeńinde merzimi kelgen kameraldyq baqylaý boıynsha habarlandyrý hattarynyń oryndalý ýaqyttary 2020 jylǵy 1 maýsymǵa deıin uzartyldy;
- óz bastamasymen taǵaıyndalatyn memlekettik kiris organdarynyń tekserý sharalary tótenshe jaǵdaı kezeńinde ýaqytsha toqtatyldy.
- ekonomıkanyń eń kóp zardap shekken salalaryndaǵy shaǵyn jáne orta bıznes úshin 6 aıǵa (bıylǵy jyldyń 1 sáýirinen 1 qazanyna deıin) salyqtar men basqa da tólemderdi esepteý jáne tóleý toqtatyldy:
- múlik salyǵy (iri saýda nysandary, saýda oıyn-saýyq ortalyqtary, kınozaldar, mádenıet jáne sport nysandary, tamaqtaný oryndary, qonaq úı bıznesi men týrıstik qyzmet úshin) - jyl sońyna deıin 0%;
- jalpy belgilengen tártipte jumys isteıtin jeke kásipkerler úshin jeke tabys salyǵy - jyl sońyna deıin 0%;
- aýyl sharýashylyǵy taýaryn óndirýshilerdiń aýylsharýashylyq jerlerine jer salyǵy - jyl sońyna deıin 0%;
- agroónerkásiptik kesheni salasynda iri qara mal men asyl tuqymdy balapandar ımportyna QQS (NDS) - jyl sońyna deıin 0%;
- áleýmettik mańyzy bar azyq-túlik taýarlarynyń 19 túri úshin QQS (NDS) jyl sońyna 12% -dan 8% -ǵa deıin;
- áleýmettik salyq - 2020 jyldyń 1 qazanyna deıin 0%;
- jalaqydan jeke tabys salyǵy - 2020 jyldyń 1 qazanyna deıin 0%;
- mindetti zeınetaqy jarnalary - 2020 jyldyń 1 qazanyna deıin 0%;
- áleýmettik aýdarymdar - 2020 jyldyń 1 qazanyna deıin 0%;
- MÁMS-ge jarnalar men aýdarymdar 2020 jyldyń 1 qazanyna deıin 0%.
Bul sharamen 700 myńnan astam salyq tóleýshi qamtylatyn bolady.
-azyq-túlik qaýipsizdigin qamtamasyz etý maqsatynda birqatar azyq-túlik taýarlaryna ımporttyq baj salyǵyn tómendetý máselesi qarastyrylýda.
Fermerlerdi qoldaýǵa asa nazar aýdarylyp otyr - josparlanǵan kóktemgi egis naýqany úshin qosymsha qarjylyq resýrstar qarastyrylǵan:
- qazaqstandyq fermerlerge «Agrarlyq nesıe korporasııasy» AQ arqyly 5%-dan aspaıtyn mólsherde 70 mlrd. teńge bólinip otyr;
- aýylsharýashylyq taýar óndirýshileri úshin dızel otynynyń baǵasy lıtrine 165 teńgege deıin nemese naryqtyq baǵadan 15%-ǵa deıin tómendetiledi.
Áleýmettik qoldaýǵa bólingen qarajattyń maqsatty jumsalýynyń tıimdi tetigin qamtamasyz etý úshin otandyq IT-kompanııalar arnaıy platforma qurýǵa kirisetinin atap ótkim keledi.
Qurmetti Qazaqstan azamattary!
Álemdi tusaýlap otyrǵan ekonomıkalyq ahýalda memleket tarapynan qabyldanyp otyrǵan bul sharalar sizder úshin jasalyp otyr. Qazaq «birlese kótergen júk jeńil» dep beker aıtpaǵan. Barshamyz bas qosa atqaratyn is-qımyldar arqyly ǵana maqsatymyzǵa jetemiz. Úkimet óz tarapynan barlyq mindetterin atqarady.
Al, sizderdiń aldaryńyzda dál qazir, karantın kezeńinde, bir-aq mindet tur - О́Z ÚILERIŃIZDE OTYRYŃYZDAR.
Tórtkúl álemge túgel qaýip tóndirgen dertke nemquraılyq tanytyp, nemketti qaraýǵa bolmaıdy. «Saqtyqta qorlyq joq» degen sóz bar. Bul ózimiz úshin ǵana emes, janymyzdaǵy jaqyndarymyz úshin de óte mańyzdy» dep jazdy ol.
