-Halyqty túsinistikpen qaraýǵa shaqyramyz. Bizde shaqyrtýdyń úsh sanaty bolady. Birinshisinde jedel járdem brıgadasy 10 mınýtta jetýi tıis. Múmkindiginshe ýaqytynan buryn barýǵa tyrysamyz. Alaıda keıde keshigetinimiz ras, onyń birneshe sebebi bar. Kóbine jolda keptelis kóp bolady, maman tapshylyǵy da qıyndyq týǵyzyp otyr. Qazirgi jaǵdaıǵa baılanysty medısına qyzmetkerlerine qurmettiń artqanyn baıqadyq, jany jomart jandar ystyq tamaqpen qamtamasyz etýdi jaýapkershiligine aldy. Memleket basshysy Qasym-Jomart Toqaevtyń qosymsha jalaqy qarastyrý jónindegi sheshimine dán rızamyz, deıdi ol.
Jedel járdem qyzmetine buryn táýligine 600-ge jýyq shaqyrtý tússe, búginde ortalyqtandyrylǵan dıspetcherlik bólimine 900-den astam shaqyrtý túsedi. Jedel járdem brıgadasyn tasymaldaýshy temir tulparlar táýligine 24 saǵat, jylyna 365 kún tynymsyz joldarda júredi. Sol sebepti jıi isten shyǵyp qalady.
Bir kólikti tórt júrgizýshi aýysymmen júrgizedi. Qazir oblys ortalyǵynyń ózinde kúnine 20 kólik kezekshilikke shyǵýǵa tıis bolsa, onyń tek 10 ǵana júrip tur. Al qalǵan arnaıy avtokólikter jóndeýdi qajet etedi. Taǵy bir másele, kólik júrgizýshileri mádenıetiniń tómendiginde. Jol-kólik oqıǵasyna túsken jedel járdem qyzmetiniń úsh kóligi garajda tur. Sot sheshimi shyqpaı, olardyń jolǵa shyǵýyna ruqsat joq. Al sotta qaralatyn ákimshilik ister birneshe aıǵa sozylýy múmkin.
