Turǵyn úı qurylys jınaq banki qaýipti ınfeksııanyń taralýyna baılanysty tótenshe jaǵdaı engizilgen kezde azamattardy karantın tártibin saqtap, úıde otyrýǵa shaqyrady. Sondaı-aq bank klıentterge yńǵaıly bolýy úshin qyzmetti qashyqtan alýǵa múmkindik beretin kanaldar jumysyn kúsheıtip otyr. Budan bólek jaqyn arada depozıtterdi onlaın-ashý servısin iske qosýdy josparlap otyr. Ol bank saıty arqyly jumys isteıtin bolady.
Elde Tótenshe jaǵdaı engizilgenge deıin bul servıs pılot rejımde synaqtan ótken bolatyn. Sonymen qatar qazir banktiń ınternet-bankıng, mobıldi qosymsha, WhatsApp jáne Telegram-kanaldar, tólem termınaldary, 300 nómiri boıynsha paıdalaýnǵa bolatyn IVR júıesi sekildi qashyqtan qyzmet kórsetýge arnalǵan servısteri táýlik boıy istep tur.
2020 jyldyń 1 toqsanynda Turǵyn úı qurylys jınaq banki salymshylary depozıtterine 125 mlrd teńge jınady. Jalpy alǵanda, jyl basynan beri 93 508 jınaq shoty ashylǵan. Depozıtterge degen mundaı úlken suranystyń sebebi – teńgeleı beriletin jáne ústemaqysy bekitilip qoıǵan nesıeniń qoljetimdigi. Depozıtterine bastapqy jarnaǵa dep aqsha jınaǵan bank klıentteri úı satyp alý úshin jyldyq ústemaqysy 2-8,5% aralyǵyndaǵy nesıe rásimdeı ala alady.
Jyl basynan beri mundaı múmkindikti Turǵyn úı qurylys jınaq bankiniń 7 592 klıenti paıdalanǵan. Qazirgi ýaqytta TQJB nesıe qorjyny 1, 034 trıllıon teńgeni quraıdy. Al merzimi bitpegen zaem sany 160 000-dy qurap otyr. Jyl basynda qoıylǵan josparly kórsetkishterdiń bárin Turǵyn úı qurylys jınaq banki 100%-ǵa oryndady. Sondaı-aq bank zaemshylarynyń nesıe sharttaryn, tártibin saqtaı alatyndyǵyn atap ótý kerek. Muny NPL deńgeıiniń tómendiginen (ýaqtyly ótelmegen, tóleý merzimini keshiktirilgenine 90 kúnnen asqan) kórýge bolady. Qazir bul kórsetkish 0,18%-dy qurap otyr, al el bankterindegi orta NPL 8%-ǵa teń.
Osy jyly bank «Baqytty otbasy» baǵdarlamasyn júzege asyrýdy jalǵastyratyn bolady. Jobanyń birinshi kezeńi nátıjeleri boıynsha 4 955 otbasy baspanaly bolǵan edi. Budan bólek 2020 jyldyń 16 naýryzynda Qazaqstanda Tótenshe jaǵdaı jarııalanǵanǵa deıin bank jańa 710 ótinishti qabyldap, maquldap úlgerdi. Nesıe ótinishterin qabyldaý 2020 jyldyń 15 sáýirinen keıin jalǵasatyn bolady.
«Áskerı ónim» aıasynda bank jyl basynan beri 71 zaem berdi, budan bólek 75 nesıe maquldanyp, olar boıynsha áskerı qyzmetkerler úı izdestirip jatyr. 129 ótinish qarastyrylý ústinde.
Qazir 1,5 mıllıonnan astam qazaqstandyq azamat baspanaly bolamyn dep Turǵyn úı qurylys jınaq bankinde aqsha jınaýda. Olardyń shotyndaǵy jalpy soma kólemi 860,6 mlrd teńgeni quraıdy.
