Polısııa departamentiniń baspasóz qyzmeti bıylǵy jyldyń 3 sáýirine deıin tártip buzýshylyqtyń 233 ákimshilik hattamasy toltyrylǵanyn habarlady. Sot sheshimimen 151 adam aıyppul, qamaýǵa alý jáne eskertý túrinde jaýapkershilikke tartylǵan. Al 82 materıal boıynsha tekseris júrgizilýde.
Mobıldi toptar oblys ortalyǵynda túngi aldyn alý reıdterin uıymdastyrýdy qolǵa aldy. Bul is-shara barysynda keshki ýaqytta serýenge shyqqan adamdarǵa karantın talaptary túsindiriledi. Sondaı-aq, turǵyndarǵa medısınalyq maska taratyldy.
Karantın kezinde shekteýlerdi saqtaý qajettigi óte mańyzdy. Qajet bolǵan jaǵdaıda ǵana kóshege shyǵýǵa bolady. Azyq-túlik alý úshin úıdiń janyndaǵy dúkendi nemese jaqyn mańdaǵy sýpermarketti tańdaǵan jón. Bul jaǵdaı dárihana men bank bólimshesine de qatysty.
Úı janýarlaryn serýendetýge bolady. Kámelet jasyna tolmaǵandarǵa eresektersiz júrýge tyıym salynady. Jasy 65-ten asqan adamdardyń úıden shyqpaǵany abzal.
Polısııa qyzmetkerleri tártip buzýshylardyń ákimshilik jaýapkershilikke tartylatynyn eskertedi.
