Qazaqstan • 03 Sáýir, 2020

Bir adam koronavırýs juqtyrsa, aınalasyndaǵy júzdegen kisige qater tónedi - B. Ýálı

137 retkórsetildi

Memleket basshysynyń baspasóz hatshysy Berik Ýálı Facebook paraqshasynda elimizdegi tótenshe jaǵdaı kezindegi ahýal men Qasym-Jomart Toqaevtyń 31 naýryz kúni málimdemesindegi mindetter jáne osy kezdegi árbir azamattyń mindeti haqynda óz pikirin bildirdi.

 

«INDET pen MINDET

Aldymen indet týraly Koronavırýs pandemııasy jer júzindegi pende bitkenniń barlyǵy birdeı ekenin, eshkimniń eshkimnen aıyrmashylyǵy joqtyǵyn kózimizge shuqyp kórsetti. Baı men kedeı de, patsha men paqyr da, aq pen qara da indettiń aldynda birdeı. Bólmeıdi, jarmaıdy. Kim ekenińe qaramaıdy. Emi tabylmaǵanymen qoımaı, shekara degen túsinikke baǵynbaıdy. Elden elge, jerden jerge erkin kóship júre beredi. Jolyndaǵysynyń bárin jalmap bara jatyr. Indetti juqtyrmaýdyń, jaqyndaryńdy aman saqtaýdyń tóte joly tynysh qana úıińde otyrý ekenin túsinýimiz kerek. Túsinip te kele jatyrmyz. Jáı júrmeı aýrý tasyp, ózińniń de, ózgeniń de basyn qaterge tikpeıik desek, shańyraǵymyzdan shyqpaýymyz qajet. Kelin túsirip, qyz uzatyp, as berip jınala bersek, onda munyń aldyn alý, jolyn bógeý múmkin emes. Elimizde Tótenshe jaǵdaı bekerden-beker engizilgen joq. Tártipke baǵyný, saqtaý shart. Sondyqtan ózimizge ózimiz jaý bolmasaq, úıden shyqpaıyq, otbasymyzdy, halqymyzdy saqtaıyq.

Endi mindet jaıynda Tótenshe jaǵdaı dedik. Qazaqstan TMD elderiniń arasynda qatań tártipti birinshi bop qolǵa aldy. Tótenshe jaǵdaı jarııalandy. Qalalar karantınge jabyldy. Nur-Sultan men Almatyda karantınniń talaptary kúsheıtildi. El bárinen habardar. Bul sharalardyń saldarsyz emes ekeni de anyq. Qanshama adam jumystan shyǵyp qalyp, kásiporyndar jumystaryn toqtatyp jatyr. Jumyssyz qalmaǵany aqysyz demalysqa jiberildi. Ekonomıkalyq turǵydan óte aýyr kezeńdi bastan ótkerip otyrmyz. Daǵdarystyń salqyny eshkimdi aınalyp ótip jatqan joq. Mundaı syn saǵatynda memleket óz azamattaryna qamqorlyq jasaýǵa mindetti. Taryqpaýyn qamtamasyz etýi kerek. Sol sebepti Memleket basshysy Qasym-Jomart Toqaev 31 naýryz kúni málimdeme jasady. Málimdememen jurt tanysty, qandaı máselelerdiń aıtylǵanynan habardar dep oılaımyn.

Sonda da bolsa keıbir tustaryna toqtala keteıin.

Tótenshe jaǵdaıǵa baılanysty tólenetin 42 500 teńge kólemindegi qarajat buryn turaqty jumys istep, jalaqy alǵandarǵa ǵana emes, sondaı-aq ózin ózi jumyspen qamtyǵan jáne resmı tirkelmeı eńbek etetin azamattarymyzǵa da beriletin boldy. 

Turmysqa qajetti zattar men azyq-túlikti tegin alatyn azamattardyń sanaty keńeıedi. Osynyń arqasynda 800 myńnan astam adamǵa kómek kórsetiledi.

Shaǵyn jáne orta bıznes ókilderi 6 aıǵa (bıylǵy 1 sáýirden 1 qazanǵa deıin) eńbekaqy tóleý qorynan ustalatyn salyqtan jáne basqa da tólemderden bosatylady. Memleket basshysy qol qýsyryp qarap otyratyn kez emes ekenin biledi. Sondyqtan osyndaı naqty sharalar qabyldanyp jatyr. Munyń barlyǵy áleýmettiń áleýmettik jaǵdaıynyń álsirep ketpeýine, daǵdarystyń saldaryn jeńildetýge, eldegi ekonomıkalyq turaqtylyqty saqtaýǵa kómek bolady, septigin tıgizedi. Iаǵnı, memleket ózine júktelgen mindetti oryndap jatyr deýge tolyq negiz bar. Árbir azamattyń mindeti haqynda Tótenshe jaǵdaıdyń qaı kezde engiziletinen qalyń jurt habardar ǵoı dep oılaımyn. Kóbine soǵys jaǵdaıynda. Aıtqan jerden aýlaq, elimizdiń sheti bútin, ishi beıbit. Degenmen myna indettiń shyǵyny soǵyspen para-par bolýy múmkin. Qazir kózimiz kórip, qolymyz ustamasa da maıdandaǵydaı áreket júrip jatyr. Ásirese, dárigerler kúnmen, túnmen sanaspaı árbir aýrý juqtyrǵan adamnyń janyn aman alyp qalý úshin aıqasýda. Bir adam koronavırýs juqtyrsa, aınalasyndaǵy júzdegen kisige qater tóndiredi. Myltyq kezenbeı-aq, oq atpaı-aq adamdar óziniń salǵyrttyǵynan, jaýapsyzdyǵynan qanshama azamattyń basyna náýbet ákeledi. Maıdan degen de biz osyny da meńzep otyrmyz. Sol sebepti árbir kisi maıdanda júrgendeı jaýapkershilikti sezinýi kerek. Áıtpese, nemquraılylyq ókindirip tyndyrýy múmkin. Kúni keshe bizge kóp nárse kerek edi, kóp dúnıege kóńilimiz tolmaıtyn. Prezıdenttiń baspasóz hatshysy retinde emes, shtatıv arqalap, sıýjet jasap eldiń arasynda júrip jetilgen jýrnalıst retinde qoǵamdaǵy pikirlerdiń bárinen habardar ekenimdi aıtqym keledi. Tirshilikte barlyǵy qajet, kóńil tolmastyq bolady. Ol qalypty dúnıe. Al qazir she? Qazir bizge bir ǵana nárse kerek. Ol - amandyq. Árbir qazaqstandyq pen tutas halqymyzdyń, jalǵyz Otanymyzdyń amandyǵy qajet. Prezıdentimiz de halyqqa jasaǵan ár málimdemesinde osyny qaıtalap aıtýda. Amandyq bolmasa, aýrý shalsa, eshteńeniń kerek bolmaı qalatynyn anyq túsindik. Ásirese, mynadaı almaǵaıyp, qysyltaıań, syndarly shaqta bir-birimizden kemshilik izdemeı, min termeı, súrinip ketse, tabalamaı, aıaqtan shalmaı, aram oılamaı, qaıta birimizdi birimiz qoldap, qamqorlyq tanytyp, járdem jasap, qoltyǵymyzdan demep, birlik kórseteıik. Ádette biz ózimizge ózgeni mysal retinde keltirýge qumarmyz ǵoı. Amerıkada tornado, Japonııada sýnamı bolyp, sonyń saldarymen búkil el jumylyp kúresip, bir-birine járdemdesip jatqanda ózimizge úlgi etemiz. «Mine, el degen osyndaı bolý kerek» dep jatamyz. Biz qashanǵy ózgeni zor sanaı beremiz? Nege qaıta basqaǵa biz úlgi bolmaımyz?! Eldigimizdi, tutastyǵymyzdy tanytaıyq. Alaqandaı jerdegi at tóbelindeı ǵana halyqpyz ǵoı. Alataıdaı búlinbeı, «sen-men» dep bólinbeı, myna synaqtan barlyǵymyz bir úıdiń balasyndaı, bes saýsaqtyń salasyndaı birigip óteıik. Bizdiń aldymyzda turǵan basty mindet osy. Eldiń de, erdiń de synalatyny osy shaq. Synalǵan sátte syr berip qalmaıyq, aǵaıyn» dep jazdy ol.

Sońǵy jańalyqtar

Qazaqtyń kúmis kómeı ánshileri

Rýhanııat • Keshe

Búgin aıt namazy oqyla ma?

Rýhanııat • Keshe

Búgin - Oraza aıt merekesi

Rýhanııat • Keshe

Maıdan dalasynan tabylǵan báki

Aımaqtar • 23 Mamyr, 2020

Jezqazǵanda 13 adam koronavırýs juqtyrdy

Koronavırýs • 23 Mamyr, 2020

Karantınde tıgizgen kómek umytylmaıdy

Aımaqtar • 23 Mamyr, 2020

Uqsas jańalyqtar