«Keshe Qaýipsizdik Keńesiniń tóraǵasy Nursultan Nazarbaev birqatar óńir ákimderimen telefon arqyly sóılesti. Osy oraıda, birinshi kezekte, tótenshe jaǵdaı kezinde halyqtyń qaýipsizdigin qamtamasyz etýdiń ózekti máseleleriniń talqylanýy qalypty jaǵdaı. Qatań karantındik talaptar aıasynda Elbasynyń jumys kabınetine kirý turǵysynda da shekteý bar ekenin túsiný kerek. Alaıda shekteýge qaramastan, baspasóz qyzmeti Tuńǵysh Prezıdenttiń qyzmeti týraly halyqty der kezinde aqparattandyrýǵa tyrysýda» dedi Aıdos Úkibaı.
Osy oraıda ol baspasóz qyzmeti buǵan deıin taraǵan aqparattarǵa sholý jasap, olarǵa qatysty pikir bildirmegenin atap ótti.
«Degenmen sońǵy kezderi jekelegen adamdar eldegi jaǵdaıdy turaqsyzdandyrý boıynsha belsendi áreketter jasaýda. Onyń ishinde Elbasynyń densaýlyǵyna qatysty shyndyqqa janaspaıtyn qaýeset taratýǵa tyrysýda. Osynyń barlyǵy - arandatý men jalǵan aqparat» dep atap ótti baspasóz hatshysy.
Sondaı-aq Aıdos Úkibaı Tuńǵysh Prezıdenttiń densaýlyq jaǵdaıy jaqsy ekenin, sonymen qatar, Elbasy Otan ıgiligi úshin karantın kezinde de jumysyn jalǵastyryp jatqanyn aıtty.
«Eger de bireýdiń kúmáni bolsa, keshe Elbasy sóılesken ákimderdiń kez kelgeninen surasyn. Engizilgen shekteýlerdiń barlyǵy toqtaǵan kezde, Tuńǵysh Prezıdenttiń qatysýymen ótken jumys kezdesýleri nemese keńesterden vıdeojazbany jeke ózim jasaýǵa ýáde etemin» dedi Aıdos Úkibaı.
Eske sala ketsek, keshe Elbasy óńir ákimderimen halyqtyń qaýipsizdigin qamtamasyz etý daıyndyǵyn talqylaǵan bolatyn.
