Aýrý taraı bastaǵannan-aq álem elderi kınoteatrlar men teatrlardy, konsert jáne kórme zaldaryn japty. Myńdaǵan adam jumyssyz qaldy. Kóptegen teatr tyǵyryqqa tireldi. Degenmen, az ýaqyt es jıyp alǵannan keıin kópshilik tyǵyryqtan shyǵýdyń jolyn izdestire bastady. Teatrlar onlaın formatqa kóshti.
Álemniń birqatar elinde onlaın translıasııanyń ózine jurt kóptep bılet satyp alyp jatyr eken. Keı teatrlar, tipti, ádettegi oryn sanynan da kóp bılet satyp jatqan kórinedi. Kınoteatrlar da jańa zamanǵa beıimdelýge tyrysýda. Shoýlar men komedııa teatrlary da Internettiń múmkindigin paıdalanyp, kreatıv ıdeıalarǵa barýda. Bul jaǵynan bizdiń elimizdiń teatrlary da qalys qalyp otyrǵan joq.
Qasıetti qarashańyraq – M.Áýezov atyndaǵy memlekettik akademııalyq drama teatry da onlaın jumysqa kóshti. Spektaklderdi onlaın kórsetýge kóshken teatr ujymy munymen de shektelmeı, onlaın syrlasý saǵattaryn qolǵa alyp otyr. Feısbýk jáne Instagram áleýmettik jelilerin paıdalana otyryp, Live formatynda tikeleı efırde suhbattar da uıymdastyra bastady. Alǵashqy syrlasý keshiniń qonaǵy teatr akteri, Qazaqstan Jastar odaǵy syılyǵynyń laýreaty, Qazaqstannyń eńbek sińirgen qaıratkeri Azamat Satybaldy boldy. «О́nerim – ómirim» atty syrlasý saǵatynda akter kórermenniń saýaldaryna jaýap berdi.
Taǵy bir syrlasý saǵaty Abaıdyń 175 jyldyǵyna oraı uıymdastyryldy. Kesh qonaǵy – akter, «Qurmet» ordeniniń ıegeri, Qazaqstannyń eńbek sińirgen qaıratkeri Bolat Ábdilmanov. Teatr sahnasynda uly aqyndy somdap júrgen Bolat Ábdilmanov da kórermenniń kókeıindegi saýaldarǵa jaýap berdi.
Áýezov teatry aldaǵy kúnderi de osyndaı maǵynaly da mazmundy keshterimen qýantpaq. Teatr akterlerimen tikeleı efırde tildeskisi kelgen kórermen ákemteatrdyń áleýmettik jelidegi paraqshalaryn qadaǵalap júrgeni jón.
ALMATY
