«Kenmart», «Magnum» jáne taǵy basqalary kartop, pııaz, sábiz jáne qyryqqabatty ózindik quny boıynsha satyp jatyr. Búgin elorda ákimi Altaı Kólginov kóterme-taratý ortalyqtarynda bolyp, qalanyń sýpermarketteri men bazarlarynyń jumysyn tekserdi.
Nur-Sultan qalasynyń ákimdigi áleýmettik mańyzy bar azyq-túlik baǵasynyń negizsiz ósýine jol bermeý, qaladaǵy karantın jáne tótenshe jaǵdaı rejımi kezinde sanıtarlyq normalardy saqtaý boıynsha sharalar keshenin qabyldady. Elordada turaqtandyrý qory quryldy. Saýda jelilerin jeńildikpen nesıelendirý boıynsha jumystar júrgizildi. «Aınalym shemasy» jobasyna «Magnum», «Astyqjan», «Kenmart», «Small», «Shapaǵat», «Evrazııa», «Artem», «Bıg Shanhaı» sııaqty saýda oryndary qatysady.
Satýshylar atap ótkendeı, azyq-túlikke qatysty dúrbeleńge eshqandaı sebep joq, «turǵyndar sórelerde barlyǵy bar ekenin kórdi, sondyqtan da alǵashqy kúnderdegideı azyq-túlikti qapshyqtap satyp alyp jatqan joq». Áleýmettik mańyzy bar azyq-túlik baǵasynyń negizsiz ósýine jol bermeý jáne sanıtarlyq normalardy saqtaý boıynsha prokýratýra men monopolııaǵa qarsy organdardyń qyzmetkerleri birlesip reıdter júrgizedi. Tártip buzýshylar jaýapkershilikke tartylady.
