Almaty qalasynda jáne basqa da birqatar óńirde bastalǵan karantın kezeńinde jalǵyzbasty qarııalarǵa ystyq tamaq jetkizý týraly Qazaqstan sportshylarynyń #Bizbirgemiz aksııasy Nur-Sultan qalasynda qoldaý tapty.
Bul bastama bıznes pen buqarany halyqqa kómek kórsetýge shaqyrǵan Elbasy Nursultan Nazarbaev pen Memleket basshysy Qasym-Jomart Toqaevtyń úndeýin qoldaý maqsatynda júzege asyrylýda.
Búgin Nur Otan partııasy Nomad MMA respýblıkalyq federasııasymen birlesip, Qazaqstandyq aralas jekpe-jek federasııasynyń, Qazaqstannyń «Penchak Sılat» áskerı óner qaýymdastyǵynyń qoldaýymen elordada turatyn jalǵyzbasty qarııalarǵa ystyq tamaq jetkizýdi bastady. Bul aksııamen barlyǵy 200-den astam jalǵyzbasty adam qamtylady.
Aksııanyń bastamashysy, Nomad MMA federasııasynyń prezıdenti Gadjı Gadjıev: «Osynaý qıyn kezeńde biz halyqtan syrt qala almaımyz. Qazirgi karantın kezeńi, ásirese, jalǵyzbasty qarııalarǵa aýyr tıip jatyr. Olardyń kóbisi ózderine tamaq daıyndaı almaıtyn jaǵdaıda. Biz olarǵa qamqorlyq jasaýymyz kerek. Eger aımaqtardaǵy bıznes-qaýymdastyq bizdiń aksııamyzdy qoldap, qarttarymyzdyń qamqorlyqsyz, kómeksiz qaldyrmaı, qoldarynan kelgen barlyq múmkindikti jasaıtyn bolsa, biz oǵan qýanamyz» dep atap ótti.
Jumysqa tartylyp otyrǵan kýrerler sanıtarlyq norma-erejelerge sáıkes qorǵanysh kostıýmderimen jáne basqa da quraldarmen qamtamasyz etilgen.
Esterińizge sala keteıik, Nur Otan partııasynyń Almaty qalalyq fılıaly, qala ákimdigi jáne Nomad MMA federasııasy 27 naýryzdan bastap jalǵyzbasty qarttarǵa tegin ystyq tamaq jetkizýdi uıymdastyrǵan bolatyn. Almatyda bastalǵan aksııa Qaraǵandy, Atyraý, Kókshetaý jáne Qulsary (Atyraý oblysy) qalalarynda qoldaý tapty. Búgingi tańda karantın kezeńinde 1500 myńnan astam qarııa ystyq tamaqpen qamtamasyz etilýde.
