Jumys barysynda qurylys alańdarynda barlyq qurylysshylarǵa medısınalyq betperde taǵyp júrý mindettelgen. Ár nysanda medısınalyq pýnktter jumys istep, jumysshylardyń dene qyzýy ólshenedi. Sondaı-aq, olar antıseptıkpen qamtamasyz etilgen. Jumysshylarǵa araqashyq 2 metrden kem bolmaýy kerektigi eskertilgen. Odan bólek, qurylys nysandarynyń aýmaǵynda COVID-19 vırýsynan saqtaný tásilderi jazylǵan eskertý plakattary ilingen.
Túrkistan qalasyndaǵy birqatar qurylys alańdaryn aralap, atqarylyp jatqan jumystarmen tanysyp shyqqan oblys ákiminiń birinshi orynbasary Qosman Aıtmuhametov óńirde qurylys toqtamaıtynyn málimdedi. «Tótenshe jaǵdaıǵa baılanysty oblystyń Bas sanıtar dárigeri qosymsha shekteýler belgiledi. Alaıda, bul qurylys jumystaryna eshqandaı kedergi keltirmeıdi. Barlyq jumysshylarǵa is barysynda tıisti saqtyq sharalaryn qatań túrde saqtap júrý týraly talap qoıylyp otyr. Búginge deıin eshqandaı kemshilikter oryn alǵan joq. Barlyǵy qalypty jaǵdaıda», – dedi Q.Aıtmuhametov. Birqatar qurylys materıaldary Shymkent qalasynan ákeletindikten azdaǵan qıyndyqtar týyndaǵan. Degenmen, eki jaqty kelisimniń arqasynda bul másele de oń sheshimin tapqan.
Túrkistan oblysy
