Sebebi, kóktem mezgil ǵana emes, jannyń kúıi ǵoı. Oılar men sezimder gotıkasynyń kúıelesh qabyrǵalaryn qıratý. Júrek renessansy.
Kóńil kúıim – kvantty. Atomdar bir sátte birneshe jerde bola alady. Adam da – atomdar jıyntyǵy. Soǵan sáıkes, men de qazir úıde nemese redaksııada ǵana emes, birneshe jerde ómir súrip jatyrmyn. Barshan baýlarynda jáýdir kózdi jikil sulýyna jyr oqyp turmyn. Sansyz Saıramılermen birge Otyrar kitaphanasyndamyn. Muhammed Haıdar myrzanyń janynda bir sátte joq bolyp ketken qalaǵa qaraımyn. Joshy mazarynyń aldyndaǵy balbal tastardyń tórtinshisimin. Saryarqa pıramıdasyn salyp jatyrmyn. Djomolýngmada álemge kóz salyp turmyn. Amerıka jaǵalaýynda Kolýmbty qarsy alýdamyn. Úıde balalardy oınatyp otyrmyn. Eki tarıhshynyń daýlasqanynan qajyp, olardan jyraq ketip, qyrǵa qarap otyrmyn. Ráshıd ád-Dın Qorqyt atany qaıy taıpasynan dese, Ábilǵazy baıattan deıdi. Teńiz jaǵalaýynda túrik aqyny Parmaqsyz ben ázerbaıjan shaıyry Haıal Rzamen áńgimelesip turmyn. Taǵy da Qorqyt jaıly. Áýlıeniń mazary Qarmaqshyda desem, biri Derbentte, taǵy biri Masatta deıdi.
Burynǵy áýlıeler atomdar hıkmetin meńgergen. Jo-joq, bul teleportasııa emes, olar shyn máninde bir sátte birneshe jerde bola alǵan. Dádam Qorqyt búkil túrki halyqtarynyń keńistiginde kóship júrgen. Atom hıkmetin meńgergen jan ajaldy da jeńgisi kelgen. Qorqyt bir sátte birneshe jerde qaza tapqan. «Qaıda barsań, Qorqyttyń kóri» degende atalarmyz osy onyń jerlengen birneshe mazaryn aıtty emes pe?!.
Kóshpeli órkenıet – tarıhtyń kvantty kóńil kúıi. Qola dáýirinde birneshe qala salǵan halyqtyń perzenti retinde, ata-babamyz kóship-qonyp qana júrgen deýden meniń tarıhı kóńil kúıim japa shegedi. Tehranda shatyrǵa shyqqan mysyq Tarazǵa deıin jerge túspeı keledi. Jibek jolyndaǵy kerýender bir syzyq boıynda qazaq dalasyndaǵy ondaǵan qalaǵa kiredi.
Betperde kıgen kóktem. Bizdiń kvantty kóńil kúıimiz. Adam ózin shektegende ǵana shekteledi. Atomdar úsh ólshemniń shekarasynda ǵana ómir súrmeıdi.
