Kókshetaý men Qorǵaljynnyń arasyndaǵy keń kósilgen saıyn dala jańa ǵana delsal bolyp, demigip tur. Qardyń murty jańa synyp keledi. Sonyń ózinde ózen-kólderdiń arnasy mol sýǵa meltektep tur. Kúrt erise, qaýip te kóbeımek. Qazirgi tańda Atbasar, Selınograd, Astrahan jáne Arshaly aýdandarynda sý tasqynynan qorǵaný jumysyna 147 adam, 62 tehnıka jáne 15 sýsorǵysh tartylǵan. Jaǵdaı kúrdelenetin bolsa, qosymsha rezervtegi 2410 adam jáne myńnan asa tehnıka jumyldyrylmaqshy.
–Keshe QR Ishki ister mınıstriniń orynbasary Iýrıı Ilınmen birge jergilikti mamandar aımaqtyń barlyq sý aıdyndaryn áýeden baqylap shyqty. Ásirese Selınograd, Astrahan, Atbasar, Zerendi aýdandaryna erekshe nazar aýdaryldy. Jalpy alǵanda, óńirde jaǵdaı turaqty, ózenderdiń muzy erı qoıǵan joq. Boljamǵa qaraǵanda, sońǵy kúnderi kún jylynady dep kútilýde. Mine, sol sátte Jabaı, Esil, Kolýton ózenderindegi sý deńgeıi kóteriledi. О́ńirdegi kópirler men jol ústindegi sý ótkizetin qubyrlar tegis tazartyldy. Qazir Atbasar, Selınograd aýdandarynda qardy syrtqa shyǵarý jáne bógetterdi bekitý jumystary júrip jatyr,–deıdi oblystyq tótenshe jaǵdaılar jónindegi departamentiniń bastyǵy Alekseı Sovetov.
«Qamdanǵan qapy qalmaıdy» degendeı, tótenshe jaǵdaılar jónindegi departamenttiń kún qabaǵyn baqqany da kóńilge demeý.
