Bilim • 06 Sáýir, 2020

Qyzdar ýnıversıteti mektep muǵalimderine kómek kórsetip jatyr

23 ret kórsetildi

Elimizdegi qashyqtan oqytý tehnologııasy arqyly oqýshylarǵa bilim berýdi ońtaıly uıymdastyrý úshin Qazaq ulttyq qyzdar pedagogıkalyq ýnıversıtetiniń oqytýshylary mektep muǵalimderine ádistemelik kómek kórsetý boıynsha sheberlik synyptary men vebınarlar serııasyn bastady. Bul týraly oqý ornynyń resmı ókili Jandar Asan málimdedi.

«Pedagogıkalyq joǵary oqý oryndarynyń eń basty mıssııasy – mektep muǵalimderine ádistemelik turǵydan kómek kórsetý. Qazirgi kúnde muǵalim mamandaryn daıyndaıtyn ujymnyń aldynda atalǵan mindetti júzege asyrýdyń oraıy týyp otyr» dep atap ótti J. Asan.

Koronavırýs indetine baılanysty elimizdegi mektep oqýshylary merziminen buryn demalysqa shyqqany belgili. 5 sáýirden bastap olardyń demalys merzimi aıaqtalyp, al 6 sáýirden Qazaqstandaǵy orta mektepter qashyqtan oqytý tehnologııasy men onlaın túrde bilim alýǵa kóshýde.

Elimizdegi qashyqtan oqytý tehnologııasy arqyly oqýshylarǵa bilim berýdi ońtaıly uıymdastyrý úshin Qazaq ulttyq qyzdar pedagogıkalyq ýnıversıteti mektep muǵalimderi men oqýshylarǵa naqty qoldaý kórsetý boıynsha birqatar isti qolǵa aldy.

«Buǵan sebep te joq emes. Elimizdegi pedagog kadrlaryn daıarlaıtyn irgeli oqý ornynyń qashyqtan oqytý tehnologııasy boıynsha kópjyldyq tájirıbesi bar. Ýnıversıtettiń professor-oqytýshylary 8 jyldan beri atalǵan ádisti sátti paıdalanyp keledi» deıdi oqý ornynyń resmı ókili.

Qolǵa alynǵan shara barysynda bitirýshi kýrs stýdentteri pedagogıkalyq praktıka sheńberinde mektep oqýshylaryna onlaın formatta tapsyrmalardy oryndaýǵa, tárbıe jumysy boıynsha ınteraktıvti is-sharalardy uıymdastyrýǵa, sandyq tehnologııalardy qoldana otyryp sabaqtarǵa daıyndalýǵa kómek kórsetpek.

Sonymen qatar bolashaq mamandar mektep muǵalimderine zamanaýı tehnologııalardy paıdalana otyryp sabaqtar men tapsyrmalardy daıarlaýǵa, ata-analar jáne bilim alýshylarmen onlaın túrde ózara qarym-qatynas jasaýdyń ádis-tásilderimen keńinen tanystyrmaq.

Ýnıversıtettiń professor-oqytýshylary da bul isten qalys qalmaıdy. Olar atalǵan joba sheńberinde qashyqtan oqytý tehnologııasynyń ereksheligi týraly óz tájirıbelerimen bólisip, ádistemelik kómek kórsetý boıynsha sheberlik synyptar serııasyn uıymdastyrýdy bastap ketti.

Atap aıtqanda, alǵash bolyp Informatıka jáne qoldanbaly matematıka kafedrasynyń aǵa oqytýshylary Nazgúl Mametjanova men Lázzat Rsalına «Bilim berýdegi onlaın platformalar» taqyrybynda vebınar ótkizdi. Oǵan Almaty qalasynyń Almaly, Alataý, Áýezov, Bostandyq, Medeý, Jetisý, Túrksib jáne Naýryzbaı aýdandaryndaǵy jalpy bilim beretin mektep, gımnazııa men lıseılerdiń 100 muǵalimi qatysty.

Aldaǵy ýaqytta bul shara jalǵasyn taba beretin bolady. Oǵan elimizdiń ózge de óńirlerindegi muǵalimder qatyspaq.

Vebınarlar men sheberlik synyptary Qyzdar ýnıversıtetiniń YouTube jelisindegi resmı paraqshasynda jarııalanady.

 

 

 

 

 

Sońǵy jańalyqtar

Almaty mańynda jer silkindi

Aımaqtar • Keshe

Uqsas jańalyqtar