Prezıdent ásirese indetpen kúresip jatqan dárigerlerge erekshe qoldaý kórsetiletinin atap ótti. «Búginde búkil elimiz dárigerler men medısına qyzmetkerleriniń qaısarlyǵyna tánti bolýda. Olar – adam ómirine arasha túsip jatqan búgingi kúnniń batyrlary. Sondyqtan pandemııaǵa qarsy kúrestiń aldyńǵy leginde júrgenderge qosymsha qoldaý kórsetý jóninde sheshim qabyldadym. Dárigerlerge jáne medısına qyzmetkerlerine 3 aı boıy qosymsha ústemeaqy tólenedi. Medısına qyzmetkerleriniń ómirin saqtandyrý máselesi de sheshimin tapty. Árıne aq halatty abzal jandar budan da zor qoldaýǵa laıyq», dedi Memleket basshysy.
Munyń mańyzy erekshe. Damyǵan elderde koronavırýspen kúreske jumyldyrylǵan dárigerlerge erekshe qamqorlyq kórsetiledi. Prezıdenttiń qabyldaǵan sheshimi elimizdiń damý jolyndaǵy taǵy bir baspaldaǵy ispetti.
Jalpy, aq halatty abzal jandarǵa erekshe qoldaý kórsetý osy pandemııa aıaqtalǵannan keıin toqtap qalmaýy tıis. Qazaq «birinshi baılyq – densaýlyq» dep beker aıtpaıdy. Dárigerler – dál osy densaýlyqty saqtaýǵa jaýapty birden-bir qyzmetkerler. Iаǵnı olardyń eńbegi laıyqty eskerilýi tıis.
Qoǵamda 42500 teńge máselesi de kóp talqylandy. Ony kimniń alatyny da suraq týǵyzǵan. Buǵan Q.Toqaev naqty jaýap berdi. Soǵan oraı bul qoldaýǵa ózin ózi jumyspen qamtyǵandar men resmı tirkelmeı jumys isteıtinder de ıe bolady. Bul kómek belgilengen tártip boıynsha shyn máninde muqtaj adamdarǵa ǵana berilmek. Memleket basshysynyń aıtýynsha, bul kómekpen jalpy 3 mıllıonǵa jýyq azamatymyz qamtylmaq. Sonymen qatar turmysqa qajetti zattar men azyq-túlikti tegin alatyn azamattardyń qatary kóbeıedi. Atap aıtqanda, mundaı kómekti múgedekter jáne jumyssyz retinde tirkelgen azamattar da ıelenedi.
Qoryta aıtqanda, tótenshe jaǵdaı kezinde memleket halyqty umytpaıtynyn, eldegi ıgilik halyq úshin ekenin anyq ańǵartty.
Jambyl AHMETBEKOV,
Parlament Májilisiniń depýtaty
