Qoǵam • 08 Sáýir, 2020

Baýyrjan Baıbek Elbasy bastamasyna qoldaý bildirgen mesenattarǵa alǵys aıtty

51 ret kórsetildi

Elbasynyń tapsyrmasy boıynsha, Memleket basshysynyń bastamasymen qolǵa alynǵan «Biz birgemiz!» aksııasy aıasynda Nur Otan partııasy men Tuńǵysh Prezıdent qory koronavırýspen kúres jaǵdaıynda turǵyndardyń áleýmettik álsiz toptaryn qoldaýǵa qarjy bólgen edi. Mesenattar, kásipkerler men belsendi azamattardyń qoldaýynyń arqasynda elimizdiń barlyq aımaqtarynda búginge deıin 30 myń otbasyǵa, onyń ishinde jalǵyzbasty qarttarǵa, erekshe qajettiligi bar jáne t.b. azamattarǵa kómek kórsetildi. Bul týraly Nur Otan partııasy Tóraǵasynyń birinshi orynbasary Baýyrjan Baıbek facebook-paraqshasynda jazdy. 

«Nursultan Nazarbaevtyń bastamasymen qurylǵan «Birgemiz» qory ótken aptada 150 myńnan astam muqtaj azamatqa 50 myń teńge mólsherinde tikeleı aqshalaı kómek kórsetý týraly sheshim qabyldady. Bular negizinen karantın qıyndyqtaryn kóbirek shegip jatqan 23 iri qalanyń turǵyndary. Ákimder men áleýmettik qorǵaý organdary usynǵan kómek alýshylar tizimderinde tabys deńgeıi eń tómen áleýmettik álsiz toptardan quralǵan azamattar qamtylǵan.

Materıaldyq kómek aqshany ekinshi deńgeıdegi bankter arqyly jeke tulǵanyń karta nemese aǵymdaǵy shotyna qolma-qol aqshasyz aýdarý arqyly kórsetiledi. Sonymen birge, materıaldyq kómek kórsetken kezde banktik komıssııasyz jáne eger azamattardyń nesıelik qarazdary bolǵan jaǵdaıda, bul qarajatty sol qaryzdy tóleý úshin ustap qalmaý máseleleri qarastyryldy» dep jazdy Baýyrjan Baıbek.

Sondaı-aq partııa Tóraǵasynyń birinshi orynbasary búgin-erteń 50 myń teńge kólemindegi birjolǵy tólemdi indet juqtyrǵandardyń 70%-ke jýyǵy shoǵyrlanǵan Nur-Sultan jáne Almaty qalalarynyń 2 myńnan astam dárigerleri de alatynyn jetkizdi. Buǵan deıin «SQ-Farmasııa» úkimettik operatorymen Nur-Sultan, Almaty jáne Shymkent qalalary turǵyndarynyń álsiz toptaryna tegin taratý úshin 5 mıllıon maska satyp alý týraly shartqa qol qoıylǵan.

«Jalpy búginge deıin «Birgemiz» qoǵamdyq qorynyń esepshotyna 14 mlrd teńgege jýyq qarjy tústi. Osyndaı kúrdeli kezeńde Elbasy bastamasyna qoldaý bildirgen barlyq mesenattarǵa taǵy da alǵysymdy bildiremin. Jınalǵan qarajat jáne óńirler boıynsha bólingen kómek týraly aqparatty baqylap otyrý úshin birgemiz2020.kz resmı saıty ashyldy» dedi B.Baıbek.

 

Sońǵy jańalyqtar

Rýbl baǵamy quldyrady

Ekonomıka • Keshe

Uqsas jańalyqtar