Mamandar Qostanaıda mundaı joıqyn boran 20 jyldan beri bolmaǵanyn aıtady. Dúleı boran talaı terekti qulatyp ketti. Oblys ortalyǵynyń ózinde ǵana 21 bıllbord jyrtylyp, 48 baǵdarsham qıraǵan. Isten shyqqan baǵdarshamdar aptanyń sońyna deıin qalpyna keltirilýi tıis. Al polısııa bergen málimet boıynsha, keshe oblysta 106 jol kólik oqıǵasy bolǵan. Aımaqtyń bas shaharynyń ózinde bir kúnniń ishinde 48 kólik soqtyǵysy tirkelip otyr.
«Qostanaı energııa ortalyǵy» seriktestiginiń málimetinshe, alapat boran keshe 09 saǵat 46 mınýtta «KEGOG» kompanııasyna tıesili kerneýi 500kV bolatyn 6 elektr jelisin isten shyǵarǵan. Odan keıin kúni boıy kerneýi 220 kV bolatyn taǵy 8 elektr jelisi úzilip, saldarynan Qostanaı oblysyndaǵy júzdegen eldi meken jaryqsyz qalǵan. Munyń syrtynda, kompanııanyń joǵary voltty jelilerin ustap turǵan 42 tireýish qulap, toq symdary úzilip ketken.
«KEGOG» mamandary aýa raıynyń qolaısyzdyǵyna qaramastan, isten shyqqan 14 elektr jelisin tolyqtaı jóndep, qaıta jandandyrǵan. Sondaı-aq, 220 kV kerneýli Sokol – Zarechnyı – Ortalyq – Qostanaı elektr jelileri de qalpyna keltirildi.
Qazir oblys ortalyǵynda tirshilik qaıta jandanyp, turǵyn úılerge birtindep elektr qýaty berile bastady. Búgin jumys kúniniń aıaǵyna deıin barlyq úı jaryq, jylý jáne sýmen tolyq qamtamasyz etilýi tıis.
Qostanaı oblysy
