Qaraǵandyda oblystyń bas ımamy О́mirzaq Bekqojanyń qoldaýymen «Mansur» TQKO jáne «Aspap» JK kásiporyndary bastama kóterip, sanıtarlyq blok-beketterde qyzmet etip júrgen erlerge ystyq tamaq jetkizdi.
Oblystyń bas moldasy bul sharapatty mol sharýanyń maqtan, bolmasa jalǵan bedel jınaý úshin jasalmaǵanyna basa mán berdi.
– Bir-birimizdi qoldap, sóz kómeginen de, qol kómeginen de aıanyp qalmaıyq. Qıyndyqty birikkende ǵana eńsere alamyz. О́zderińizdi saqtańyzdar, karantın talaptaryn oryndańyzdar! – dedi О́mirzaq Bekqoja.
Qaıyrymdy kásipkerdiń biri Qýandyq Ǵabdýalıev degen azamat eken. Kezinde ózi de tártip saqshysy bolyp qyzmet etipti.
– Burynǵy áriptesterime qandaı jýapkershilik artylǵanyn jaqsy túsinemin. Osy qıyn sátte olarǵa moraldyq qoldaý kórsetip, qaısar minez kórsetip júrgenderi úshin alǵys aıtqymyz keledi. Koronavırýsty da jeńermiz, tótenshe jaǵdaı men karantın de aıaqtalar. Ýaqytpen sanaspaı jumys istep júrgen jerlesterim tezirek shańyraqtaryna oralsyn dep tileımin! – deıdi kásipker.
О́kinishke qaraı, Qaraǵandy oblysynda taǵy da jeti adamnyń COVID-19 juqtyrǵany anyqtaldy. Bular buǵan deıin koronavırýspen aýyrǵan jáne karantınge jatqyzylǵan naýqastermen aralas-quralas bolǵan adamdar. Qazirgi ýaqytta olardyń barlyǵy ınfeksııalyq bokstarǵa oqshaýlandy jáne tıisti em-dom alyp jatyr.
Qaraǵandy oblysynda koronavırýs ınfeksııasyn juqtyrǵandardyń sany 55-ke jetti. Bir naýqas osy dertten qaıtys boldy.
Jalpy, Qaraǵandy oblysynda 1 440 adam úı karantıninde otyr. Táýlik boıy baqylaýǵa alynǵan 908 turǵyn bar, onyń ishinde 54-i ınfeksııalyq boksqa jatqyzylǵan. Bulardyń bári 1A jáne 1B sanatyndaǵy elderden oralǵan nemese koronavırýs juqtyrǵan adamdarmen shartty túrde baılanysta bolǵan azamattar.
Qaraǵandy oblysy
